S’es fòrça parlat dins los mèdias de la redobertura de la catedrala de de París, mas mens del fach que l’acceleracion de las òbras de restauracion, après l’incendi de 2019, a suscitadas de criticas dins los domenis environamental, patrimonial e scientific, çò rapòrta The Conversation. D’expèrts denóncian que l’exigéncia per respectar de relambis estreches a mancat a d’aspèctes essencials de la preservacion del patrimòni.

D’en primièr, se critica los tractaments aplicats sus la pèira e d’autras superfícias interioras—coma lo descapatge intensiu e l’usatge de tecnicas industrialas de talh— qu’an eliminat de marcas istoricas e de detalhs arquitectonics que serián estats precioses per de recèrcas futuras.

D’autras questions son la desaparicion d’ancians enduches, l’uniformitat excessiva de las superfícias e l’usatge de produches quimics amb de compausants organics volatils (COV) que polluisson l’environament. A mai, lo procès a mespresada la biodiversitat presenta dins lo monument, coma los liquens e los aucèls.

Malgrat aqueles elements negatius, lo projècte s’es destacat per l’utilizacion de tecnologias modèrnas, coma la fotogrametria, per testimoniar del procès. Totun, de critics assolidan qu’aquelas innovacions compensan pas la pèrda d’elements istorics que poirián èsser estat estudiats mai prigondament se la restauracion s’èra facha amb mai de temps e non pas a la lèsta per que lo cap de l’estat francés Emmanuel Macron se’n satisfaguèsse publicament, coma se’n vantèt lo 5 de decembre passat.