En Super XIII, lo calendièr se metiá a jorn. En país catalan, doas partidas en retard del campionat se joguèron aquesta dimenjada. A Sant-Estève, dissabte, jos la pluèja e dins la ventòrla, los Dragonets baton Vilanòva 20-14.

A Pià, dimenge, l’esquipa locala (que la ven de jónher Elòi Pelissièr) domina aisidament Avinhon: 28-10.

Dissabte 14, Carcassona transforma lo revenge de la finala passada amb la venguda d’Albi en Magic Rescontre Lipet amb, abans e aprèp la partida, de produccions localas (ustras, cagaròts, cambajon, pescajons,…) o pas (flammekueche, burgers, focaccias, etc.).

Al programa tanben d’aqueste dissabte: Dragonets-Vilafranca, Tolosa-Pià, Avinhon-Lesinhan. Dimenge, l’afrontament entre Orses e Grizzlies clavarà lo programa d’aquesta desena jornada.

Primièrs torns de la Cup

La Cup anglesa veirà son primièr torn se jogar lo dissabte 11 e lo dimenge 12 de genièr. 17 partidas son al programa. De notar un afrontament entre la formacion de l’armada anglesa e la de la RAF (Royal Air Force)!

Las 34 esquipas en liça provenon de: 3 clubs de las armadas, 15 de la National Conference League, 12 de las ligas regionalas anglesas, l’esquipa de la polícia britanica, una formacion escocesa, una formacion galesa e una formacion irlandesa.

Los clubs de League One e del Championship dintraràn dins la competicion pel segond torn (25-26 de genièr). Ramentarem que Tolosa se marca pas a la Cup en rason del còst d’inscripcion que lor i es demandat.

Las formacions de Superliga dintraràn en competicion tre los setzens (8 e 9 de febrièr) e non en ueitens coma los ans passats.

Quatre règlas novèlas

Per la sason novèla, la Superliga se bota a l’ora australiana: los capitanis auràn dreit a un « challenge » (una escomesa), la demanda del vidèo per contestar una decision arbitrala; los còps de pè de remandadís de jos los pals o dels 20 m que sortiràn dirèctament o que faràn pas 10 mètres seràn sancionats per la palma balhada a l’adversari, en plaça d’una penalitat. Instauracion d’un carton verd pel remplaçament provisòri d’un nafrat. Enfin, sul jòc al pè, los jogaires fòra-jòc mas passius seràn pas pus sancionats.

En fin de sason, i aurà pas de davalada e montada automaticas entre Superliga e Championship. IMG tornarà faire son classament amb sos critèris e los primièrs 12 jogaràn la Superliga de 2026.

Tolosa e los sòus

Los problèmas budgetaris de las comunas francesas van pertocar lo Tolosa Olimpic. La vila de Tolosa ven d’anonciar una baissa de 20% de las subvencions acordadas als clubs esportius tolosans, amators coma professionals.