Los Pirenèus pèrdon lors glacièrs, e la nèu tomba a d'altituds de mai en mai nautas, amb de sasons ivernalas de mai en mai cortas. Segon Ara, l'escalfament climatic tòca particularament las grandas sèrras e los Pirenèus i fan pas excepcion. Pendent lo darrièrs 175 ans, del periòde preïndustrial enlà, la sèrra a perdut lo 95 % de son glaç, e la temperatura mejana a aumentat de 4°C dins aquelas zònas glaçadas, fòrça mai qu'en altitud mai bassa.

A l'ora d'ara, los qualques glacièrs presents dins los Pirenèus se tròban en Aragon e en Occitània. Se compta uèi solament 14 glacièrs e 26 congièras dins l'ensemble dels Pirenèus, contra 50 glacièrs e 43 congièras dins los ans 1980. En quaranta ans, 51 formacions glaciàrias an desaparegut, e las que subsistisson pèrdon cada annada entre tres e quatre mètres d'espessor e mai de vint mètres d'espandida.

Lo glaciològ catalan Jordi Camins prevei que los glacièrs dels Pirenèus auràn de tot en tot desaparegut d'aicí a 2050. Sols demorarà de rèstas de glaç rebondut jols materials d'erosion. L'impacte de l'escalfament climatic es ja vesidor: las temperaturas dins las zònas ont se tròba los glacièrs an aumentat de 4°C, un fenomèn encara mai marcat en montanha que dins las zònas mai bassas. Aquel escalfament afècta tanben la nèu, que tomba de mai en mai naut e rèsta mens longtemps, acorchant aital las activitats economicas ligadas al freg, coma l'esquí, que se deurà adaptar a aquel novèl contèxt climatic.