Los cònsols màgers nòrd-catalans an decidit de portar la question de l’utilizacion del catalan davant lo Conselh d’Estat, en vista d’una eventuala sasina de la Cort Europèa dels Dreches Umans, a Estrasborg. Aquela decision fa seguida a la decision de la Cort d’apelacion de Tolosa, que confirmèt que lo francés deviá èsser la lenga prioritària pendent los conselhs municipals, en autorizant l’usatge del catalan sonque s’es precedit d’una traduccion en francés. Los cònsols màgers, sostenguts per l’associacion catalana Òmnium Cultural, jutjan aquela decision insufisenta e desiran d’anar mai luènh.

Segon Marie Costa, cònsol màger d’Els Banys d’Arles, e Nicolas Garcia, cònsol màger d’Elna, aquela decision es pas ni una victòria ni una desfacha. “Benlèu i a pas gaire d’espèr amb lo Conselh d’Estat, mas aquò nos permet d’anar en Euròpa, doncas permet de protegir los dreches lingüistics de cada ciutadan. [...] Es la faiçon d’obligar l’estat francés de reconéisser nòstra existéncia”, çò diguèt Garcia. En mai d’aquò, la permission de poder utilizar lo catalan mòstra que cèrts arguments legals qu’an per mira de restrénher son usatge son de mens en mens pertinents. L’avocat Mateu Pons a precisat qu’an ara dos meses per sasir lo Conselh d’Estat, basat a París, e aqueste metrà encara dos ans per balhar sa decision finala.

Xavier Antich, president d’Òmnium Cultural, a denonciat lo fach que lo catalan siá relegat a l’estatut de lenga subaltèrna. Pasmens, considèra qu’aquela lucha pòt marcar una virada, en permetent a la lenga catalana de se far ausir dins los conselhs municipals. L’afar poiriá plan dobrir la draia a una reconeissença mai larga del catalan dins las institucions publicas francesas. “Auçam la batalha per la defensa del catalan a un autre nivèl, daissam darrièr nosautres los tribunals administratius a l’escala regionala e departamentala e ara, los cònsols màgers e Òmnium, afrontam dirèctament l’estat francés”, çò revendiquèt Antich.