Los estudiants e las estudiantas del departament d’occitan de l’Universitat Pau Valèri de Montpelhièr son a trabalhar amb la comediana e marionetista Florence Thiébaut, de Théâtre Mathieu, dins l’amira d’una lectura teatralizada de tèxtes de Max Roqueta.

Los tèxtes causits revèrtan la varietat de son òbra e de son escritura: pròsa, poesia, teatre.

Las mariòtas permeton un autre biais de s’apoderar dels tèxtes e de los far ausir, descobrir, a un public larg, que siá occitanofòn o pas. Aquestas mariòtas, las creèron per la primièra mesa en scèna de Medelha.

Lo projècte es menat en partenariat amb l’associacion Pierre et Soleil de Sant Adornin (Erau), la comuna e la metropòli de Montpelhièr.

Una primièra lectura publica se tendrà lo dimenge 26 de genièr a 17h a la sala Verd Paradís del vilatge de naissença de l’autor, Argelièrs (Menerbés).

Lo trabalh final se donarà dins la garriga de Sant Adornin (Montpelhierenc), sus lo camin dels poètas, lo dissabte 14 de junh a l’escasença d’una granda jornada d’omenatge per los vint ans de la mòrt de Max Roqueta.

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jornalet.com