Lo president sud-corean Yun Seokyeol foguèt destituït dissabte passat pel parlament après sa temptativa controversiada d'impausar la lei marciala lo 3 de decembre. Segon Sud-Ouest, dels 300 deputats de l’Assemblada Nacionala, 204 votèron per aquela mocion, 85 votèron contra, 3 s’abstenguèron e 8 vòtes foguèron considerats nuls. S’arrapant a sas foncions, Yun espèra d’ara enlà la decision de la Cort Constitucionala, qu’a fins a sièis meses per confirmar o anullar aquela destitucion.

Pendent son discors televisat, Yun Seokyeol, visiblament esmogut, admetèt sa desfacha politica, apelant a “una politica de deliberacion e de consideracion” puslèu qu'a la de confrontacion. En son abséncia, lo primièr ministre Han Deoksu assumís la presidéncia per interim, prometent un govèrn estable malgrat la crisi institucionala.

Pels opausants, aquela destitucion representa una victòria manifèsta per la democracia. Bak Chandae, cap del Partit Democrata, la principala fòrça d’oposicion, declarèt que l'imposicion de la lei marciala constituissiá una “grèva violacion de la Constitucion”. De manifestacions massissas avián eclatat davant l'Assemblada Nacionala, ont mai de 200 000 personas celebrèron, al son d’una K-pop eissordosa, çò que considèran coma un trionf popular.

De son costat, l’Union Europèa a cridat a una resolucion rapida d'aquela crisi politica, soslinhant l'importància del respècte dels procediments democratics.

Yun Seokyeol, elegit en 2022, aviá justificat son còp de fòrça del 3 de decembre per son desir d’“aparar la Corèa del Sud liberala de las menaças pausadas per las fòrças comunistas nòrd-coreanas e eliminar los elements ostils a l'estat”, acusant lo parlament dominat per l'oposicion de torpilhar totas sas iniciativas e de blocar lo país.