Dins la vila siriana de Raqqa, simbòl de la revolucion, una fragila coexisténcia s’installa entre curds e arabis, mentre que la menaça de las milícias pròturcas e l’espèctre dels jihadistas totalitaris de l’Estat Islamic contunhan de pesar, çò rapòrta 3cat. La plaça centrala de Naïm, ont tronan de letras afichant ufanosament “I Love Raqqa”, encarna aquela tension latenta. Los blindats curds circulan, mentre que las roïnas son encara los testimònis de las batalhas que liberèron la vila del contraròtle de l’Estat Islamic.

La velha, una celebracion gaujosa virèt al caos. Los tirs en l’aire d'arabis que festejavan l’issatge de la bandièra de la revolucion siriana degenerèron en afrontaments quand la polícia curda intervenguèt. Las autoritats curdas acusèron d’infiltrats armats d'aver orquestrat las violéncias, del temps que de fonts localas evocavan de mòrts e de desenats de nafrats.

Los curds, organizats jos l’Administracion Autonòma del Nòrd e l’Èst de Siria (AANES), temptan de manténer l'òrdre dins aquela region de majoritat aràbia que contraròtlan dempuèi lor victòria contra l’Estat islamic. Mas lor objectiu demòra clar: preservar una autonomia similara a la del Curdistan iraquian, en cercant una ententa amb lo regim de Damasc. Pasmens, lor legitimitat es fragilizada pel scepticisme a respècte del novèl regim sirian, dirigit per Muhammad al-Julani, un ancian membre d'Al Qaida. L'AANES contraròtla l'equivalent d’un tèrç del territòri sirian: la region de Rojava (lo Curdistan sirian tradicional) aital coma las vilas aràbias levadas a l'Estat Islamic per las milícias curdas pendent la guerra, coma Raqqa.

Una menaça persistenta

Malgrat sa desfacha oficiala, l’Estat Islamic consèrva una preséncia. Las cellulas dormentas e de desenats de milièrs de simpatizants, acantonats amb sas familhas dins de camps coma Al-Hawl, representan una menaça constanta. “Raqqa es estrategica e simbolica per eles. Sómian de la reconquistar per terrorizar tornarmai lo mond”, çò avertís Meshab al-Turkan, cogovernador de Raqqa.

La pression turca

Al nòrd, los curds afrontan las atacas incessantas de Turquia, per mejan de bombardaments de l’Armada Nacionala Siriana, la milícia finançada per Ankara. La setmana passada, la vila de Manbij tombèt, après uèch ans de contraròtle curd, e Kobané foguèt picada.

Aquela instabilitat fòrça de milièrs de curds de fugir. A Raqqa, 5000 refugiats son amolonats dins d'escòlas, en esperant un camp. Mas l'arribada de las milícias pròturcas, a mens de 50 quilomètres, los poiriá empénher a reprene lor fugida, venent de desplaçats perpetuals.