Lo regim iranian a adoptada una novèla legislacion qu’a per mira d’afortir la “cultura de la castetat e de l’hijab”, intensificant la repression contra las femnas que desfisan las estrictas règlas impausadas per l’estat pertocant lor comportament e lor aparéncia, çò rapòrta The Guardian. Segon Amnestia Internacionala, aquela lei constituís una “escalada perilhosa” que permetriá quitament d’impausar la pena de mòrt a las que practican un activisme pacific contra las leis discriminatòrias sul cairat obligatòri.

Aquela legislacion, que conten 74 articles e intrèt en vigor lo 13 de decembre passat, prevei de sancions sevèras, e mai la flagellacion, de pesugas emendas, de penas de preson, aital coma de defensas de viatge e de restriccions sus l’accès a l’educacion e l’emplec per las femnas que respèctan pas lo pòrt obligatòri del cairat. Las entrepresas privadas que contravendrián a aquela obligacion pòdon tanben èsser sancionadas. En mai d’aquò, los foncionaris qu’agarrisson violentament las femnas e las dròllas per lor non-respècte del cairat benefícian d’una impunitat totala.

L’article 37 de la lei va mai luènh en criminalizant las personas que promòvon o propagan l'indecéncia, lo desvelament o lo “marrit vestit” al près d'entitats estrangièras, e mai los mèdias internacionals e las organizacions de la societat civila: poirián encórrer fins a dètz ans de preson e d’emendas de fins a 15 000 èuros. Aquel tèxt prevei quitament que las personas jutjadas responsablas de “corrupcion sus Tèrra“ poirián èsser condemnadas a mòrt, una disposicion que d’organizacions de defensa dels dreches umans considèran coma un mejan de reprimir los activistas e las femnas iranianas que publican de vidèos de denóncia del regim.

Aquela lei foguèt redigida en responsa a la contèsta massissa del cairat en seguida de l’assassinat de Jina Mahsa Amini en 2022, un eveniment qu’avièt lo soslevament “Femnas, vida, libertat”. La lei apareis tanben un mes après qu’Ahoo Daryaei aguèt tirats sos vestits en signe de protèsta, après una interpelacion per aver pas respectada l’utilizacion “adeqüata” de l’hijab.