Lo cap d’aficha en Super-XIII aqueste dissabte 14 de decembre èra lo revenge de la finala passada del campionat: Carcassona recebiá Albi a Domèc. Las causas comencèron plan pels locals: una penalitat e un ensag transformat aprèp una ataca de 80 mètres. Mas a partir d’aquí, los Tigres se mostrèron mai collectius en defensa e sustot mai agressius. Plantèron tres ensages abans la pausa per menar 16-8 a la pausa. Jos la pluèja, lo segond acte virèt a una explicacion qu’entraïnèt una cordelada de cartons jaunes e ont los Tigres ajustèron una penalitat per ganhar 18-8, una partida qu’es la primièra desfaita, al gost plan amargant pels carcassoneses. A Avinhon, los locals s’impausèron fàcia als lesinhaneses: 22-18. Pià va ganhar a Tolosa: 30-10.

Dimenge, coma èra pas la dimenjada dels audencs, Limós es batut a St Gaudenç: 22-26.

Lo marrit temps sus Pirenèus Orientals faguèt remandar la partida Dragonets-Vilafranca que se deviá debanar a Illa del Riberal.

Al programa de l’onzena jornada que clavarà quasi definitivament la fasa anar en aquesta debuta d’ivèrn:

• aqueste dissabte 21: Limós-Avinhon; Vilafranca-Tolosa; Lesinhan-Vilanòva; Albi-St Gaudenç

• aqueste dimenge 22: Pià-Carcassona.

Eleccions a la Federacion

Una sola lista se presentava per menar la Federacion: lo president actual, Domenge Baloup, qu’aviá pres la carga aprèp la demission de Luc Lacòsta a l’estiu de 2023, es recondusit per un mandat de 4 ans.

Isaah Yeo, Pantèra de la Sabata d’Aur

Lo trofèu del melhor jogaire 2024 de las partidas internacionalas, remés per la Federacion internacionala: lo Golden Boot (Sabata d’Aur) es estat autrejat al tresena-linha de las Pantèras de Penrith: Isaah Yeoh.

Isaac Yeoh èra tanben lo capitani de la formacion australiana venceira de la Copa del Pacific, fasiá part dels Blaus venceires dels Estats d’Origina e contribuiguèt al quatren títol en seguida de sa formacion en NRL.

En segonda posicion, veniá l’anglés Herbie Farnworth e en tresena l’australian Tom Trbojevic.

Doas victòrias per l’Africa del Sud

A Pretòria, l’Africa del Sud ganha fàcia als Estats Units: 38-18 lo 4 de decembre, mas los estatunidencs s’impausan dins lo revenge 44-32, lo 7 . Los africans faràn part del torneg amb los franceses per l’atribucion de las darrièras 2 plaças de participacion a la Copa del Mond de 2026.

A Tirana, los grècs van atomizar los albaneses: 86-0.

Una esquipa papó en NRL

Aqueste dijòus 12 de decembre, los primièrs ministres d’Austràlia e de Papoa-Nòva Guinèa an oficializat la preséncia en NRL d’una esquipa papó, basada a Pòrt Moresby, en 2028. Serà la 18a esquipa d’una competicion que l’NRL desira de 20 clubs en 2032, annada dels jòcs olimpics a Brisbane. Se parla de la preséncia d’un club a Perth. De seguir…