Divés, après mei d'un mes d'interdiccion pr'amor de la preséncia de dinofisis, la prefectura tornèt autorizar la pesca, la venta e la consomacion de las ústrias e cotòias deu baçin d'Arcaishon. Totun, las muscles e coscolhas demòran enebidas.

Es una navèra de las bonas per los ostreïcultors de la laca. De hèit, la debuta de prima èra estada regde guastada per l'interdiccion qu'empachèt la comercializacion, tota la temporada de vacanças escolaras, e per los mantuns dias hestejats d'abriu e de mai.

Lo dinofisis, causa d'aquera longa barradura, es un fitoplancton toxic que contamina las coscolhas en demorar dens sons teishuts, un còp qu'an filtrada l'aiga de mar. La soa preséncia n'es pas excepcionala, dens las aigas deu gòlfe de Gasconha o de la Mancha. Bretanha o Normandia son regularament tocadas per nivèths importants de dinofisis, tanlèu que la temperatura de l'aiga puja drin.

Adara, los ostreïcultors esperan l'arribada deu bèth temps e la debuta de la sason toristica per compensar las perdudas divudas a l'interdiccion. A Arcaishon, a l'entorn deu Bacin e dens tota Gironda, las ústrias demòran un simbèu de non pas mancar, qu'agradan tant aus locaus com aus toristas.



Pèir-Joan Masdiset