Lo dimars 17 de decembre, festegèrem Nadal a l’escòla. A la debuta de decembre, Nono e Flor, los nòstres farfadets, nos portèron una pichona soca de vinha en classa.

Nos expliquèron qu’en Occitània es pas lo paire Nadal que pòrta los presents, mas una bèla soca d’arbres fruchiers.

I a fòrça longtemps, la velha de Nadal, lo mai pichon e lo mai vièlh de la familha fasián lo torn del domeni en cèrca d’una soca bèla que botiàn a cremar dins la chiminièra. Se disiá que se brutlava lendeman matin, portariá bonaür et santat a tota la familha. Mas per que brutlèsse, caliá entreténer lo fuòc e doncas dormir pas. E per dormir pas, se caliá ocupar: faire la fèsta e manjar de sucre!

Alara, òm manjava un repais plan gras que se clavava pels tretze dessèrts. Èra tanben l’escasença d’escambiar de presents que sovent èran de causas que demoravan dins lo gardamanjar: de blat, de carn, de formatge, de farina, etc.

Doncas, en classa, farguèrem de presents de s’escambiar lo jorn de la ceremònia. Tanben prenguèrem suènh de la soca en li balhar a manjar, li contar d’istòrias, li faire de careças.

Los farfadets nos diguèron que caliá dire una formula magica per que la soca sortiguèsse los presents. Alara, aprenguèrem aquesta formula que vos anam faire descobrir:

«Buta fuòc, cacha fuòc
Que nos alègre
Que nos faga la jòia d’èsser aquí l’an que ven
E se sèm pas mai, que siam pas mens!»

Lo jorn de la ceremònia la diguèrem un còp, mas pas res ne sortiguèt. Lo segond còp, la soca sortiguèt de presents pels parents qu’aviam fargat en classa e tanben pels fraires e sòrres. Lo tresen còp, la soca sortiguèt los presents d’escambiar mas sustot los qu’avián comandats: la pelucha Gaston l’unicòrna, lo libre de las emocions e un jòc de piratas. Aprèp, degustèrem los tretze desserts. Nos daissèrem los uèlhs emplenats de magia.

Polit Nadal e bonas fèstas de fin d’an!

Emma CM1

Illustrator: Pema, mejana seccion

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jornalet.com