Tres de las quatre partidas que se jogavan dissabte s’acabèron per una victòria aisida pels clubs que recebián: Limós bat Avinhon 34-0, Vilafranca domina Tolosa 36-12. Albi signa una quatrena victòria en seguida en prenent lo melhor sus Sent-Gaudenç: 38-6.

Partida mai sarrada entre Verds e Blancs al Molin ont cada esquipa menèt. Vilanòva prenguèt l’avantage 20-18 a un quart d’ora de la fin e lo mantenguèt fins a la còrna;

Demorava de clavar la fasa anar per un rescontre en Salanca aqueste dimenge entre Pià e Carcassona (mancarà la partida Dragonets-Vilafranca, pas jogada la setmana passada). Fasiá un vent a descornar los buòus en Salanca. Carcassona aviá degut compausar amb los suspenduts e los nafrats aprèp la desfaita fàcia a Albi. Pià sasissiá los audencs a freg e marcava tres ensages dins lo primièr quart d’ora per menar 20-10 a la pausa. Carcassona preniá l’avantatge 24-22 a qualques minutas de la fin, mas un darrièr ensag balhava la victòria als catalans 26-24.

La dimenjada que ven serà de pausa abans los ueitens de finala de la Copa per la primièra dimenjada de 2025.

Un punt sul classament

Carcassona clava aquesta fasa anar en cap de classament perseguit per Albi e los Dragonets. La bona suspresa ven de Vilafranca actualament seisen. Vilanòva pòt pensar a la qualificacion, alara que Sent-Gaudenç, Lesinhan e Avinhon son a la pena. Es de mal engolir per Lesinhan qu’acaba cinc partidas amb lo punt de bònus defensiu. L’esquipa de Tolosa es redusida a faire de figuracion: 10 desfaitas e un sol punt de bònus defensiu.

Respectatz los arbitres

Cada partida de Super-XIII foguèt precedida de la lectura d’un long comunicat dels arbitres que ramentava la necessitat de respectar lo còrs arbitral e d’evitar tota agression verbala o fisica. Una bona causa de remembrar e de botar dins lo cap de totes: jogaires, entraïnaires, dirigents, sostens, public… Aquò val per totes los espòrts: al XIII de mostrar l’exemple!

I agèt ça que la un arbitre assucat aqueste dissabte: en se replegant aprèp aver fiulat una penalitat, En Poumès truquèt l’espatla d’un davant albigès e quitèt lo terren sus un baiard. Mas aquò èra un incident de jòc, pas una brutalitat!