Dijòus passat Jacques Blondel, un estatjant de Marinhana (País Marselhés), foguèt tuat dins sos 61 ans après ensajar d’arrestar dos malfactors qu’èran a raubar dins un bar-tabat. Segon los testimònis, après trucar l’escotèr dels bandits, Blondel ensagèt de rasonar amb eles en agafant lor fusilh. Alavetz un dels dos joves “reprenguèt l’arma, tirèt un còp en l’aire e dos còps en sa direccion” (de Jacques Blondel).
 
Un jove de 18 ans foguèt detengut e mes en examen per “raubament amb arma” e “assassinat per assegurar l’impunitat de son autor”, çò declarèt lo procuraire adjonch d’Ais de Provença, Denis Vanbremeersch. L’autre raubaire es encara en fugida.
 
Lo jove interpelat afrontariá una reclusion criminala a perpetuitat, mai que mai après las declaracion del magistrat que diguèt que “l’ensems dei testimoniatges venon confirmar lo caractèr volontari de l’assassinat qu’a seguit lo raubament amb arma”. En mai d’aquò, veniá de complir sos 18 ans qualques oras abans lo crime.
 
Lo detengut es ja conegut per la polícia per una dotzena de delictes, sustot de raubaments amb degradacion o efraccion en 2011 e 2012. Lo primièr còp que foguèt detengut aviá 15 ans. Es estat condemnat tres còps pel tribunal per enfants, executava una pena de quatre meses amb mesa a l’espròva. Èra seguit per la Proteccion Judiciària de la Joventut, aviá respondut a la majoritat de las convocacions, e mai se sa personaltitat se revelava, segon lo jutge dels enfants, “de mai en mai fugidissa e ermetica a tot acompanhament sociau e educatiu”, çò indicava Vanbremeersch. Lo procuraire disiá tanben qu’al compte rendut que se deviá debanar la davalada que ven, èra prevista “una revocacion d’aquela mesa a l’espròva”.
 
Segon son fraire ainat, lo jove èra “vengut impulsiu” après èsser agredit a l’arma blanca fa un an e mièg. Lo fraire ainat, dins sos 28 ans, pòt pas encara creire çò que s’es passat. “Siam totei sota l’estomagada”, çò declarèt dissabte passat. “Cresi que s’agís mai d’un accident per inconsciéncia qu’un assassinat a sang pausat. Compatissi per la familha Blondel qu’a perdut un pròche, un paire, un papet. Sauvi lo dòu de verai, e m’excusi personalament”, çò diguèt.
 
De son costat, la maire parlava dissabte al jornal Le Parisien, ont definissiá lo detengut coma un jovent “ben brave e afectuós” qu’aviá un comportament de mai en mai instable dempuèi que son paire èra partit del domicili familial, fa un an e mièg. “Jamai auriáu cregut que fariá çò que l’acusan d’aver fach” çò disiá la maire.
 
Segon Christian Sivy, lo director adjonch de la polícia judiciària (PJ), lo jove suspècte “nos a dich que pren consciéncia de la gravitat dei fachs e qu’es desolat per la familha e lei pròches”.
 
Lo procuraire Vanbremeersch soslinha qu’“ara lor cau reparar, avançar amb mai d’intelligéncia, e aquò comença per se far conéisser per aqueu qu’es pas encara estat interpelat. La preson participarà a la sancion, mai serà ren qu’una part de la solucion s’es pas assumida per un e l’autre deis autors dins lo respècte dei victimas e de sei pròches”.
 
Uèi a 18h00 es prevista una marcha silenciosa a Marinhana en omenatge a la victima. Lo cortegi se reünirà davant lo bar-tabat on se passèt la tragèdia.
 
Lo jornal Le Parisien a fach un important seguiment d’aquel afar.