Lo 22 de decembre passat, Donald Trump relancèt son interès per Groenlàndia, territòri autonòm jos sobeiranetat danesa, en afirmant qu'es crucial pels Estats Units de prene son “contraròtle”, çò rapòrta Le Figaro. Dins una publicacion sus Truth Social, soslinhèt que Groenlàndia comportava una importància estrategica per la seguretat nacionala dels Estats Units. Pasmens, la responsa del primièr ministre groenlandés, Múte Bourup Egede, foguèt sens ambigüitat: “Groenlàndia es nòstra. Sèm pas per vendre, e o serem pas jamai”. Ajustèt que Groenlàndia, tot en restant fidèla a son autonomia, demorava dobèrta a la cooperacion internacionala, en particular amb sos vesins.

Aquela situacion es pas novèla. En 2019, Trump aviá ja exprimida l’opinion de crompar Groenlàndia, o qualificant d'“enòrma transaccion immobilièra”. Totun, aquela proposicion foguèt lèu rebutada pel govèrn groenlandés, que reafirmèt fermament que l'illa èra pas per vendre. Malgrat aquò, Trump a pas cessat de soslinhar las ressorsas naturalas abondosas de Groenlàndia, talas coma l'aur, lo coire o l'urani, e son emplaçament geopolitic estrategic. Cal soslinhar que l'illa benefícia d'una larga autonomia dempuèi 1979, e dispausa de sos pròpris govèrn e institucions amb l'oficialitat de sa pròpria lenga.

Lo canal de Panamà e Canadà

Las ambicions de Trump se limitan pas, ça que la, a Groenlàndia. La meteissa dimenjada, evoquèt tanben lo contraròtle del canal de Panamà, una draia maritima estrategica entre l'Atlantic e lo Pacific. Trump critiquèt los dreches de passatge que Panamà impausa als vaissèls americans e suggeriguèt que se lo país garentissiá pas un foncionament segur e fisable del canal, los Estats Units ne poirián exigir la restitucion totala. Aquela declaracion faguèt resson a una autra proposicion controversiada de Trump: la d'integrar Canadà coma 51n estat dels Estats Units. Segon el, aquela fusion permetriá als canadencs de gaudir d'estalvis substancials dels impòstes e los forniriá una màger proteccion militara. Pasmens, un recent sondatge mòstra que sola una part pichona de canadencs sosten aquela idèa.

Groenlàndia manten sa politica de non-venda

Pertocant Groenlàndia, malgrat que sas ressorsas naturalas e sa posicion estrategica dins l'ocean Artic atiren l'atencion de poténcias mondialas talas coma China e Russia, lo país manten sa politica de non-venda tot en cercant de se desvolopar sus la scèna internacionala. Lo govèrn groenlandés, ara, s’interèssa a la creissença economica e a la dobertura al comèrci de son territòri, coma ne testimònia l'agrandiment de l'aeropòrt de Nuuk, que permetrà a partir de 2025 l'arribada de vòls dirèctes en provenença de Nòva York.