Lo govèrn espanhòl a anonciada la desclassificacion d’una partida de la documentacion secreta restacada als atemptats terroristas del 17 d’agost de 2017 a Barcelona e Cambrils (Catalonha). Aquela decision a luòc mai de sèt ans après los eveniments e respond a las demandas dels partits independentistas e de las victimas, que cèrcan d’esclarzir las informacions sus l'autor e las responsabilitats de las accions terroristas.

Demest los documents que seràn desclassificats, i a d’informacions sus las vesitas que los agents del Centre Nacional d’Intelligéncia de l’estat espanhòl (CNI) faguèron a l’imam de Ripoll, Abdelbaki Es Satty, quand foguèt encarcerat a Castelhon per trafec de drògas. Aqueles documents poirián esclarzir una possibla implicacion del CNI dins los atemptats.

La decision de desclasificar aqueles documents coïncidís amb la reactivacion dins lo Congrès dels Deputats de las comissions d’enquista sus aqueles atemptats e sus l’Operacion Catalonha, la conspiracion policièra promoguda pel govèrn espanhòl qu’aviá per tòca d’arrestar lo procès independentista catalan. Aquelas comissions, creadas en febrièr mas inactivas fins ara, an començat de foncionar. Lo Partit Socialista o a degut entamenar per poder pachar lo budget de 2025 amb lo partit de Carles Puigdemont.

Malgrat aquela decision, la polemica contunha. Dins una recenta compareissença al Congrès, l’ancian director del CNI, Félix Sanz Roldán, desmentiguèt que l’imam de Ripoll foguèsse un confident dels servicis secrets. Totun, evitèt de revelar de detalhs especifics, en afirmant que la documentacion èra pas encara estada desclassificada.

La desclassificacion d’aqueles documents es vista coma un pas important per las victimas e qualques sectors politics que cèrcan d’esclarzir los faches. I a totjorn fòrça questions de respondre a prepaus d’aqueles atemptats que daissèron 16 mòrts e mai de 100 nafrats.