Un episòdi de tension lingüistica brandiguèt l’Ostal de la Generalitat de Catalonha a Perpinhan, çò rapòrta Vilaweb. Pel primièr còp, la tradicionala carta de vòts de Nadal foguèt enviada unicament en francés, una decision que suscitèt una viva indignacion. Aquela omission del catalan foguèt denonciada per la jornalista rossellonesa Júlia Taurinyà sul ret social X (ancianament Twitter): “Çò que votatz al sud a tanben de consequéncias aicí”, çò planhiá Taurinyà dins son messatge. En mai d’aquò, lo tèxt francés conteniá tres decas d’ortografia, un detalh qu’amplifiquèt las criticas dins l'internet.

Lo cap de l’Ostal de la Generalitat dempuèi octòbre passat, Christopher Daniel Person, nomenat pel govèrn de Salvador Illa, foguèt dirèctament amirat per de repròchis. Fàcia als nombroses planhs, una correccion foguèt portada: una segonda version de la carta de vòts, aquel còp integralament redigida en catalan, foguèt mandada tard dins la serada.

Es pas lo primièr còp que Christopher Person se retròba al còr d’una controvèrsia. En octòbre, la decision d’anullar la remesa del prèmi Veu Lliure a l’escrivana turca Pınar Selek aviá tanben provocadas de criticas. L’organizacion aviá denonciat una anullacion arbitrària, anonciada a la darrièra minuta, malgrat una logistica ja en plaça.

D’origina francesa mas nascut a Cervera, en Catalonha, Person es especialista de mercatica numerica, sens ligams dirèctes anteriors amb la Catalonha Nòrd. Aquel contèxt alimenta los debats sus sa nominacion e son ròtle dins una institucion que sa mission es de promòure las lenga e cultura catalanas.

L’Ostal de la Generalitat a Perpinhan foguèt inaugurat en setembre de 2003 pel president Jordi Pujol. Sas foncions principalas son d’ajudar a crear e afortir los ligams de totes tipes, institucionals, economics, lingüistics, culturals o toristics, entre la Catalonha Sud e la Catalonha Nòrd. Depend del departament de la presidéncia de la Generalitat.

Per primer cop, la Casa de la Generalitat a Perpinyà envia felicitacions només en francès. El que voteu al sud també té conseqüències aquí. En Christopher Person haurà d’aprendre rebent que allà on l’han posat la gent també parla català. Vergonyeta, ⁦@casagovperpinya⁩ pic.twitter.com/yJyxMZrvoW

— Júlia Taurinyà (@JuliaTaurinya) December 23, 2024

A les 21h40, més de 6 hores després de l’enviament de la versió francesa i sens dubte gràcies a les denúncies per aquí, han enviat la versió catalana. pic.twitter.com/3kaM137slN

— Júlia Taurinyà (@JuliaTaurinya) December 23, 2024