Lo meteis jorn que se votèt la mocion de censura que censurèt lo primièr ministre de França Michel Barnier, son govèrn metèt en consulta un projècte qu’eliminava las consultas ciutadanas suls megaprojèctes industrials, çò rapòrta Reporterre. Aital, Barnièr partiguèt en daissant un decret per modificar las categorias de projèctes someses a la Comission Nacionala del Debat Public (CNDP) qu’aviá per tòca de n’exclure tot projècte industrial que foguèsse superior a 300 milions d’èuros, jos l’escampa d’accelerar la reïndustrializacion. La proposicion, passèt gaireben per malha al mitan de la crisi politica.

La CNDP, creada en 1995 pel quite Barnier quand èra ministre de l’environament, es una autoritat independenta que velha per la participacion ciutadana tocant l’elaboracion de projèctes d’impacte environamental. Malgrat que sas recomandacions sián pas constrenhentas, an agut un ròtle important dins la modificacion del 60% dels projèctes consultats.

Lo decret governamental foguèt somés a una consulta publica en linha fins a divendres 27 de decembre, ont faguèt l’objècte de 3500 contribucions, majoritàriament negativas.

Ilaria Casillo, vicepresidenta de la CNDP, avertís que se s’apròva lo decret, “la populacion aurà pas pus son mot de dire sus aqueles projèctes e serà quitament pas informada de lor existéncia, de lor impacte o de lor còst”. Casillo assegura qu’aquela proposicion “mòstra que l’estat a paur de la votz ciutadana”.

Aqueste ensag de limitar las competéncias de la CNDP es pas lo primièr. Anteriorament, l’èx-ministre de l’economia Bruno Le Maire aviá temptat de la suprimir dins l’encastre d’un projècte de lei de simplificacion que fin finala capitèt mal.