Lo multimiliardari Elon Musk incita sos partisans a far pas de dons a la fondacion que gerís Wikipédia après qu’aquesta a previst de consagrar mai de 50 milions de dolars a d’iniciativas ligadas a la diversitat, l’equitat e l’inclusion (DEI), çò rapòrta lo New York Post. Sus X (ancianament Twitter), Musk, que compta près de 210 milions de seguidors, escriguèt: «Arrestatz de balhar a Wokepèdia (sic) fins que restabliscan l’equilibri dins lor autoritat editoriala». Aquel messatge fasiá seguida a un pòst de l’influenciaira d’extrèma drecha e anti-LGBTIQ+ “Libs of TikTok”, qu’aviá partejat un grafic mostrant que lo 29% del budget de Wikipèdia per 2023-2024 (siá 177 milions de dolars) èra consagrat a aquelas iniciativas. Pasmens, aquela decision a alimentat las criticas d’unes, qu’acusan aquelas iniciativas de favorir un biais ideologic, en particular contra las personalitats de drecha.

Ja en 2021, Elon Musk faguèt una ofèrta per crompar Wikipèdia, prepausant un miliard de dolars en escambi d’un cambiament de nom de la plataforma en “Dickipèdia”. Aquela proposicion un pauc vulgara, dick significant en anglés tras que familiar tant «sèxe masculin» coma «pegàs», formulada tanben sus X, s’inscriviá dins la continuitat de sas criticas acèrbas de Wikipèdia, qu’acusa de travèrses ideologics e de manca de rigor. Segon Musk, aquela ofèrta èra «per la precision», insinuant que l’enciclopèdia èra pas fisabla. Malgrat qu’aquela proposicion foguèsse formulada sus un ton trufaire, atirèt l’atencion sus la polemica creissenta a l’entorn de la gestion de Wikipédia e de sas practicas editorialas. En responsa, Jimmy Wales, lo fondador de Wikipèdia, rebutèt fermament l’idèa de vendre la plataforma, soslinhant que Wikipédia demorava fidèla a sa mission d’accès liure a la coneissença, malgrat las criticas.

Malgrat aquelas controvèrsias alimentadas per l’extrèma drecha estatsunidenca, Wikipèdia demòra una de las fonts d’informacion mai consultadas al Mond, amb près de 4 miliards de vesitas mesadièras. Las criticas de Musk, doncas, fan pas res mai que demostrar lo poder mondial enòrme de Wikipèdia que, recordem-o, ten una version en occitan amb mai de 90 000 articles.

Stop donating to Wokepedia until they restore balance to their editing authority https://t.co/sHjnFTtN5y

— Elon Musk (@elonmusk) December 24, 2024