L’International Rugby League a publicat lo classament de las nacions tretzistas en s’apiejant sus las resultas dels rescontres internacionals.

Cò dels òmes, 57 nacions son classadas. En primièra posicion, Austràlia precedís la Nòva Zelanda. Los angleses son tresens davant Tònga, Samoa, Fiji e Papoa. França manten sa ueitena plaça, seguida per Serbia e las illas Cook.

En coa de classament, se trapa Ongria, Marròc, Soïssa, Estònia, Belgica e Danemarc.

Cò de las femnas, meteis trio en cap (Austràlia, Nòva Zelanda e Anglatèrra) que pels òmes. França ocupa lo quatren sèti, abans Papoa, Galas e Irlanda. 27 nacions son classadas: Malta, Turquia e Liban clavan la lista.

En 13-cadieral, 10 nacions sont classadas. En cap, Anglatèrra. França es segonda e Irlanda tresena. Venon puèi Austràlia e Galas.

60 federacions son representdas a l’IRL: 8 federacions fan part de la federacion americana; 11 de la zòna Asia-Pacific; 27 europèas e 14 la zòna Africa-Orient Mejan.

Fa 80 ans: la represa del campionat

Interdit per Vichèi, lo rugbi de XIII tornava prene son vam tre novembre de 1944 amb una primièra jornada de campionat organizada lo dimenge 5.

Dotze clubs participavan a la competicion: XIII Catalan, Tolosa Olimpic, Vilanòva, Costièra Basca, Bordèu, Estadi Tolosan, Carcassona, Lesinhan, Albi, Tarbas, Montpelhièr e Besièrs. Per jogar la Copa, s’i ajustaràn Roana, Lion, Cavalhon e lo CASG París.

Obligacion èra faita als jogaires d’aver un mestièr o un emplec.

L’AS Carcassona emportariá aqueste campionat de represa en batent lo Tolosa Olimpic 13-12 dins una finala jogada a Perpinhan (estadi Jean Laffon)

La Copa veniá al XIII Catalan que batiá Carcassona 27-18 dins una finala jogada al Pargue dels Princes a París. Los audencs prendrián lo revenge dins la finala de 1946: victòria 27-7 dins una partida jogada a Tolosa (estadi Chapou) davant 18 000 espectators.

Un dèrbi Lesinhan-Limós en ueiten de la Copa

La Copa de França, amb sos ueitens de finala, dobrís l’annada 2025. Una sola partida se jogarà aqueste dissabte 4 de genièr: Avinhon-Dragonets.

Al programa de la jornada de dimenge 5:

• tres autras oposicions entre clubs de Super XIII lo dèrbi Lesinhan-Limós al Molin; St Gaudenç-Carcassona; Vilanòva-Pià,

• tres clubs d’Elèit 2 recebon d’esquipas del nivèl superior: Palau-Albi, Vilagalhenc-Argon/Vilafranca, Illa-Tolosa,

• la partida Carpentràs-Tonens assegura la qualificacion en quart de finala d’una formacion d’Elèit 2.

Los quarts de finala son previstes pels 8 e 9 de febrièr; las mièjas finalas la dimenjada dels 22 e 23 de març e la finala a Brutus la primièra dimenjada de mai.

Vos desiram una bona annada esportiva, ovala e tretzista!