Una idèa de las bonas per acabar las vacanças... o començar l’annada novèla: lo concors d’escritura en occitan del Lector de la Val!

Las bibliotècas del Lector de la Val (associacion de bibliotècas de Lauragués/sud-èst tolosan) organizan lor XIn concors de novèlas en occitan, dobèrt a totes e gratuit, fins al 6 de febrièr de 2025. Cal escriure une seguida a la frasa: “Jamai aviá pas ausit quicòm aital. S’encaminèt cap a l’endreit d’ont veniá la musica...”

Lo concors prepausa quatre categorias: primari, segondari, licèus, adultes (los tèxtes collectius son permeses se fan partida de l’ensenhament d’una classa tota). Lo tèxt deu necessàriament començar amb la frasa çai sus. Lo genre demòra liure: fantastic, policièr, sciéncia-ficcion, istoric, romanesc, aventura, etc… o pas brica de genre que siá. Totas las variantas de la lenga d’òc son benvengudas, a carga pel participant de passar l’incipit dins son dialècte pròpi. Se pòt tanben participar en francés, a partir de la frasa: “Jamais elle n’avait entendu quelque chose de semblable. Elle se dirigea vers l’endroit d’où provenait la musique.”

La remesa dels prèmis se tendrà lo 24 de mai de 2025 a la mediatèca de Dònavila (Lauragués) e la remesa de las rejonchas de novèlas als autors es prevista pel mes d’octòbre de 2025. Un CD àudio de tèxtes occitans causits per la jurada serà fargat en mai de l’edicion del libre.

Per mai d’entresenhas o per obténer lo reglament: info@lecteurduval.org o sus la pagina web del concors.