De colònias de micròbis vius son estadas trobadas dins una fractura sagelada dins una ròca vièlha de 2 miliards d’annadas. Segon l’Universitat de Tòquio, aquela ròca foguèt traçada del complèxe ignèu de Bushveld, en Africa del Sud, una region famosa per sas ricas jaças de minerals, e qu’abriga d’ara enlà la mai anciana pròva de micròbis vius descobèrts dins una ròca. Una còla de cercaires a perfeccionat una tecnica que combina l’espectroscopia infraroja, la microscopia electronica e la microscopia fluorescenta per confirmar qu’aqueles micròbis èran indigènas a l’escapolon e non lo resultat d’una contaminacion.

Aquelas recèrcas ofrisson un apercebut unic sus l’evolucion de la vida primitiva sus Tèrra e dobrisson de perspectivas pivelairas per la recèrca de vida extraterrèstra, sustot dins d’escapolons de ròcas marcianas d’edat similara.

L’escapolon de ròca proven del complèxe ignèu de Bushveld, una intrusion magmatica formada pel refregiment lent del magma jos la superfícia terrèstra. Aquela estructura geologica, establa dempuèi sa formacion, a permés a de micròbis extremofils de subreviure dins de fendasclas comoladas d’argela, los isolant completament de l’environament exterior.

Gràcias a l’analisi de l’ADN e de las proteïnas dels micròbis, los cercaires an confirmat lor preséncia viva e lor autenticitat. “Aquelas descobèrtas sus Tèrra m’estrambòrdan per las possibilitats de trobar de formas de vida similaras dins de ròcas ancianas de Mart,” çò declarèt Yohey Suzuki, autor principal de l’estudi.