Un nòu estudi suggerís que beure de bevendas sucradas aumenta fòrça lo risc de malautiás cardiovascularas. Dins l’estudi, publicat al numeric Frontiers in Public Health, los cercaires espepissèron l’associacion entre lo consum de cèrts aliments e bevendas sucradas e lo risc de patir mai de 7 malautiás cardiovascularas. L’estudi aguèt per mòstra 69 705 suedeses d’edats situadas entre los 45 e los 83 ans.

Aital, los cercaires descobriguèron que manjar tròp de sucre apondut e de bevendas sucradas pòt aumentar lo risc d’aquelas malautiás o d’aneurisma a mai d’insufisença cardiaca e de fibrillacion auriculara.

Consumar de sucre o pas

Lo consum de sucre apondut ja èra positivament restacat amb de malautiás isquemicas e l’aneurisma aortic abdominal, e tanplan i aviá una associacion entre lo consum de bevendas sucradas e de malautiás isquemicas, l’insufiséncia cardiaca, la fibrillacion auriculara e l’aneurisma d’aòrta abdominal. Aquò tanben foguèt associat al consum de pastissons, chocolat e bonbons, sucre de taula, mèl o confituras.

Aquelas malautiás cardiovascularas incluson la mòrt per crisi cardiaca, una malautiá plan frequenta en Euròpa. Pasmens, segon los cercaires, aquela evidéncia es pas conclusiva. “La descobèrta mai marcanta de l’estudi es la desparièra relacion entre diferentas fonts de sucre apondut e lo risc de malautiás grèvas,” çò diguèt Suzanne Janzi, de l’Universitat de Lund.

Per comprene cossí lo consum de sucre afècta lo risc de patir aquelas malautiás e se lo consum de diferents tipes de sucre càmbia lo risc, los cercaires estudièron de donadas de dos estudis màgers. Aquestes foguèron realizats entre 1997 e 2009.

Analisèron tres classas de consum de sucre —lo mèl, la pastissariá e las bevendas sucradas coma las bevendas gasosas— e las malautiás restacadas: las crisis cardiacas, l’insufisença cardiaca, los aneurismas aortics, la fibrillacion auriculara e l’estenòsi aortica.

Los participants foguèron estudiats fins que moriguèsson. En 2019, 25 739 participants de l’estudi foguèron diagnosticats amb una malautiá grèva. Los cercaires utilizèron alara de donadas per destriar cossí los diferents tipes de sucre afèctan lo risc de diferents malautiás, e trobèron que consumar de bevendas doças èra pièger per la santat que tota autra forma de sucre: beure mai de bevendas sucradas aumentava significativament lo risc de malautiá isquemica, l’insufisença cardiaca, la fibrillacion auriculara e l’aneurisma aortic abdominal. (Legissètz la seguida).

Aqueste article es publicat dins Sapiéncia, la revista occitana de divulgacion scientifica, amb la quala Jornalet a un acòrdi de cooperacion. Podètz legir l'article entièr aicí.