L’ajuda mutuala entre legumaires urbans capita ben a Marselha, çò rapòrta Reporterre qu’o presenta coma un modèl de collaboracion professionala e umana.

A la bòria pedagogica del Colet dels Comtes a Marselha, quatre agricultors urbans s’amassan cada dos meses per sosténer Joëlle Crochemore, gerenta de la bòria. Pendent la darrièra amassada, arranquèron las rèstas de caulets per preparar la plantacion de las fragas. Aquel sistèma d’ajuda mutuala permet d’avançar dins de prètzfaches laborioses, coma lo deserbatge, dins un esperit professional e solidari.

“Una jornada d’acompanhament equivau a dos ò tres jorns de trabalh”, çò explica Lou Richarme, de l’associacion marselhesa Colinèo, que practica l’agricultura biologica. Los prètzfaches son eficaçament despartits gràcias al partatge d’experiéncias, çò que contribuís tanben a luchar contra l’isolament qu’afècta sovent los agricultors urbans. “Quand siás solet, moralament es dur, mai quand siam nombrós, tot es mai aisat”, çò estima Rémy Van Den Bussche, de la bòria dels Pichons Camps dins los quartièrs nòrd de la Ciutat Focèa.

Delà lo sosten logistic, l’ajuda mutuala ven un espaci de reconfòrt emocional. Joëlle Crochemore soslinha qu’aqueles rencontres permeton de partejar aitant los succèsses coma las dificultats: “Aquò ajuda a evitar lo desespèr”. Segon las donadas de la Seguretat Sociala Agricòla, lo risc de suicidi dels pageses es d’un 43 % pus naut que la mejana. D’iniciativas coma aquesta contribuisson a refortir lo benèsser mental e emocional dels participants.

La jornada s’acaba per un dinnar comunautari e la planificacion de las activitats venidoiras. Los agricultors, que partejan tanben d’espleches e efectuan de crompas comunas, demòran en contacte per un grop Whatsapp. Aquel modèl collaboratiu, e mai siá pas dobèrt als nòuvenguts, incita d’autres domenis a s’organizar d’un biais similar.

Éparpillées à Marseille, quatre fermes urbaines ont créé un modèle d’entraide professionnelle.

Deux fois par mois, les maraîchers se retrouvent chez un confrère pour rompre leur isolement.

Lire l'article ➡️ https://t.co/QtjYqGkMAspic.twitter.com/yT4O9WBkqF

— Reporterre 🌍 | Le média de l'écologie (@Reporterre) December 31, 2024