Lo president evorian, Alassane Ouattara, anoncièt en cap d’an lo retirament de las tropas francesas de son país, çò rapòrta Euronews. Aquela decision sens dobte aprigondís lo declin de l’influéncia de França sul continent african, quitament dins l’Africa occidentala. La Còsta d’Evòri ven d’efièch la darrièra nacion africana a reduire sos ligams militars amb son anciana poténcia coloniala, après que Chad e Senegal anoncièron la meteissa mesura a la fin de 2024. Dins son discors de fin d’annada, Ouattara revelèt que lo retirament de las tropas francesas començariá aqueste mes, marcant aital la fin d’una preséncia militara de mantun decenni dins lo país. Aquela decision s’inscriu dins un procès de modernizacion de l’armada nacionala evoriana.

Lo retirament concernís principalament lo batalhon d’infantariá de Pòrt Bouët, que serà d’ara enlà gerit per las tropas evorianas. Aquela iniciativa seguís una dinamica regionala mai larga, puèi que mantun país d’Africa de l’Oèst – dont Mali, Burkina Faso, e mai recentament Nigèr – an ja demandat a França de retirar sas tropas. Aqueles cambiaments son percebuts coma una transformacion prigonda de las relacions militaras entre França e sas ancianas colònias, amb un estat francés fòrabandit de mai del 70 % dels païses africans ont aviá de tropas dempuèi la fin de sa dominacion coloniala dins los ans 1960. Desenant, las tropas francesas demoraràn sonque en Jiboti, amb 1500 soldats, e en Gabon, amb 350.

L’aflaquiment de l’influéncia militara francesa se fa sentir en tot lo Sahèl, ont los dirigents d’aqueles païses se viran cap a Russia. Lo Kremlin, per sos mercenaris, a espandit son influéncia, exacerbant la situacion securitària ja fragila de la region. Mentre que França cèrca de tornar definir son estrategia en Africa, aquel retirament simboliza una evolucion màger dins los equilibris geopolitics del continent.