Lo president chadian, Mahamat Idriss Deby Itno, reagiguèt fermament lo 7 de genièr passat als mots del president francés Emmanuel Macron, en exprimissent son malcontentament après qu'aqueste aguèt suggerit que los dirigents africans avián «oblidat de dire mercé» per l'intervencion militara francesa al Sahèl, çò rapòrta Le Monde. Aquela declaracion, facha pendent una conferéncia dels ambaissadors a París, provoquèt una onda de tust non solament en Africa, mas tanben en França.

Dins son discors, Deby qualifiquèt aquelas paraulas de mespresantas envèrs Africa, estimant que Macron «s'enganava d'epòca», e soslinhant que la decision de Chad de metre fin a la cooperacion militara amb França èra «de tot en tot una decision sobeirana». Lo govèrn chadian, per la votz del ministre dels afars estrangièrs, Abderaman Kolamallah, tanben exprimiguèt una viva preocupacion, qualificant las declaracions de Macron de «mespresantas al respècte d'Africa e dels africans».

Mali, Burkina Faso, Nigèr e Centreafrica an ja demandat lo retirament de las tropas francesas aquestas darrièras annadas, e mai recentament Senegal, la Còsta d’Evòri e Chat an fach totparièr, del meteis temps que Russia e lo grop Wagner ganhavan d'influéncia en Africa. Aquela dinamica a refortit las tensions a l'entorn de l'intervencion militara de França, iniciada en 2013 per luchar contra los grops armats jihadistas al Sahèl.

Los planhs de Macron provoquèron tanben de polemica en França. Lo partit La França Insomesa (LFI) denoncièt un paternalisme neocolonial inacceptable. En responsa, una font diplomatica francesa temptèt d'atenuar l'incident en precisant que los mots de Macron miravan pas especificament Chad o Senegal, mas puslèu los païses del Sahèl ont França a perdut fòrça soldats.