Una nòva descobèrta torna escriure l’Istòria: las pinturas rupèstras mai ancianas del Mond son dins l’estat espanhòl e èran òbra de neandertalians fa 66 000 ans. Una descobèrta dins la cauna de Maltravieso demòstra que los neandertalians, e pas Homo sapiens, foguèron los primièrs artistas en Euròpa fa mai de 66 000 ans.

Aquò es aital pr’amor qu’una còla internacionala de cercaires, menada per Christopher D. Standish e d’autres arqueològs de l’Universitat de Southampton, a fach una descobèrta que contèsta las idèas tradicionalas sus las originas de l’art. Segon un estudi recent publicat dins lo numeric Journal of Archaeological Science: Reports, las siloetas de mans trobadas dins la cauna de Maltravieso en Extremadura, dins l’estat espanhòl, son pas solament las mai ancianas del Mond, mas tanben foguèron creadas per de neandertalians fa al mens 66 700 ans.

Los neandertalians, los primièrs artistas

Aquela descobèrta confirma que los neandertalians, e non pas Homo sapiens, foguèron los primièrs artistas en Euròpa. La datacion d’urani-tòri utilizada permetèt als cercaires d’analisar lo carbonat de calci que cobrís aquelas pinturas, e aital poguèron confirmar una edat minimala per aquestas. La descobèrta reafirma la capacitat simbolica dels neandertalians, e tanben reconfigura la nòstra compreneson de l’evolucion cognitiva e artistica d’aquela espècia umana.

Maltravieso foguèt descobèrta en 1951. Sus las siás parets i a mai de 70 siloetas de mans, fachas en utilizant la tecnica de bofar de pigments sus las mans pausadas contra la ròca, e daissar aital una impression negativa apuèi. Las pinturas foguèron realizadas amb de pigments minerals coma l’oxid de fèrre.

Pendent d’annadas, la datacion precisa d’aquelas òbras èra un desfís scientific. Pasmens, la còla, menada per Standish e los sieus collègas, apliquèt de tecnicas de datacion avançadas d’urani-tòri, que permetèron de determinar amb precision l’edat del carbonat que se formava sus las pinturas. La resulta foguèt susprenenta: las mai ancianas an almens 66 700 ans, fòrça abans que nòstra espècia arribèsse a Euròpa.

Las analisis revelèron una gamma d’edats que s’espandís dempuèi l’èra del Paleolitic Mejan a l’Olocèn, amb las mòstras mai ancianas que tanben son las mai prigondas de la cauna. Los neandertalians ne foguèron los autors. E aquò tanben es plan nòu pr’amor que los neandertalians son estats retraches fins ara coma una espècia primitiva, sens capacitats culturalas.

Ara, lo nòu estudi prepausa que los neandertalians èran pas sonque capables de crear d’aisinas avançadas e de practicar d’enterraments rituals, mas tanben avián una capacitat simbolica sofisticada. L’art rupèstre de Maltravieso representa doncas fòrça mai qu’un acte decoratiu. La creacion de las siloetas demandava de planificacion, d’abiletat tecnica, e qualque tipe de ritual comunicatiu. Per los cercaires, aquelas pinturas aurián pogut aver un sens social o esperital pels neandertalians.

Fins fa gaire, se cresiá que las primièras manifestacions artisticas en Euròpa èran òbra exclusiva d’ Homo sapiens . Pasmens, lo nòu trabalh apond una pròva de mai a una lista creissenta que mòstra que los neandertalians daissèron tanben un legat artistic significatiu.

D’autres estudis precedents, coma los realizats dins la cauna de La Pasiega (estat espanhòl), aviá ja suggerit que los neandertalians poirián aver creat de simbòls abstraches fa mai de 64 000 ans. La descobèrta de Maltravieso consolida aquela possibilitat en identificant un tipe d’art mai complèxe: las siloetas de man. Segon los cercaires, la tradicion d’aquel tipe d’art poiriá aver agut d’originas mai prigondas que çò que se pensava abans.

D’efièch, la recèrca dins la cauna de Maltravieso representa una avançada per l’arqueologia, e tanben per la nòstra compreneson de çò que vòl dire èsser uman. Los neandertalians se mostrèron simbolics e creatius. Lo sieu art, conservat dempuèi de desenats de milièrs d’annadas, parla d’un temps ont l’imaginacion comencèt de prene forma sus las parets d’una cauna. (Legissètz la seguida).

Aqueste article es publicat dins Sapiéncia, la revista occitana de divulgacion scientifica, amb la quala Jornalet a un acòrdi de cooperacion. Podètz legir l'article entièr aicí.