Angélique e Amandine, las doas joventas que Marie-Claude Bompard, consolessa de Bolena (Tricastin), refusèt de maridar, an trobat lo sosten del pòble. Quitament mai que çò qu’esperavan.

Tot comencèt dissabte passat, en anant a La Pòsta: “Lo factor me diguèt «siáu de tot còr amb vosautras»”, çò expliquèt Angélique Leroux a Le Dauphiné. “E parier au burèu de tabat”, çò apondèt. Los rets socials an tanplan mostrat lo sosten a las doas amorosas.
 
Mas benlèu lo sosten que mai las a tocadas es aquel del cònsol de Sant Savornin d’Avinhon (Comtat Venaicin), Bernard Goudon, que diguèt qu’èra lèst per las maridar.
 
De lor costat, las doas joventas an mandat doas letras recomandadas a la consolessa de Bolena e al prefècte del departament. A la consolessa li demandan d’aplicar la lei o que mòstre son refús per escrich, mentre que sollicitan lo prefècte per que demande a la consolessa d’aplicar la lei. Ça que la, faràn pas lor denóncia “pr’amor qu’aquò fariá pas avançar lei causas”, e elas espèran encara de se maridar lo 10 de setembre que ven a Bolena.
 
“Lor ai dich que se lor combat capitava pas, siáu lèst per lei maridar a Sant Savornin”, çò disiá lo cònsol de Sant Savornin, Bernard Goudon, que precisèt qu’es pas un combat contra la Liga del Sud, partit de Bompard, mas “una question de vejaire, e al delà, es la lei”.