Bastèt d’un discors del president francés, Emmanuel Macron, per fissonar lo Collectiu per las Literaturas en Lengas Regionalas a l’Escòla que ven d’aténher lo sosten de l’escrivan libanés d’expression francesa Amin Maalouf, secretari perpetual de l’Acadèmia Francesa.

D’efièch, a l’escasença de la presentacion de la novena edicion del diccionari de l’Acadèmia Francesa en novembre passat, Macron manifestèt una clara ostilitat a las lengas autoctònas en considerant los “pateses” coma “un instrument de division de la nacion”, çò declarava.

Lo sosten de Maalouf

Après una letra dobèrta a Maalouf, aqueste tornèt contactar lo collectiu e una amassada foguèt programada l’8 de decembre passat. Amin Maalouf portèt son sosten en assegurant que la causa èra “justa e evidenta”, “nòbla e necessària” en manifestant son sosten a las lengas minorizadas autoctònas. Lo Collectiu per las Literaturas en Lengas Regionalas a l’Escòla foguèt aculhit per Maalouf a l’Acadèmia Francesa.

L’iniciativa comencèt en genièr de 2023 al moment que foguèt decidit de tornar escriure los programas escolars e d’i inclure un còrpus de tèxtes literaris. Alavetz, un grop de lingüisticas e professors d’universitat se constituiguèt, amb tanben d’elegits, per butar a i apondre de tèxtes escriches en lengas occitana, basca, catalana, bretona, alsaciana, arpitana… Se lancèt una peticion que reculhiguèt gaireben 20 000 signaturas en plan pauc de temps.

Maalouf ajudarà a l’establiment d’un còrpus

D’un biais concret, Amin Maalouf ajudarà a l’establiment d’un còrpus que comprendrà un vintenat d’òbras (romans, de teatre, de poesia) de diferentas epòcas e de nivèls adaptats a èsser integradas al programa escolar. Un rendètz-vos es previst durant lo primièr tèrç de 2025.