Dempuèi la casuda de Kabol en 2021, la relacion entre Paquistan e los talibans afgans a pres un torn de mai en mai conflictual, çò rapòrta The Washington Post. E mai Paquistan siá estat acusat de sosténer los talibans pendent d'annadas, se tròba uèi victima de lors atacas transfrontalièras. La situacion s'intensifiquèt a la fin de decembre passat, quand un bombardament paquistanés tuèt 46 personas dins l'èst d'Afganistan, de civils segon las autoritats afganas, malgrat que lo govèrn paquistanés aja afirmat mirar una còla de milicians talibans.

Los talibans afgans an non solament refortit lors accions dintre Paquistan, mas an tanben alimentat la montada en poténcia dels talibans paquistaneses, qu'an intensificat lors atacas pel país. La casuda de Kabol inondèt parallèlament lo mercat negre paquistanés d'armas de fuòc modèrnas e de lunetas de vision nocturna, çò qu'a balhat als talibans paquistaneses un avantatge tecnologic sens precedent sus las fòrças localas. En consequéncia, de rapòrts indican un fòrt aument de la frequéncia e de l'intensitat de las atacas dempuèi la presa de poder dels talibans en Afganistan.

L'influéncia dels talibans afgans sus lors omològs paquistaneses es tanben evidenta, amb de rapòrts que fan estat de lor sosten logistic. Fòrça abitants de la region frontalièra creson fermament en aqueles ligams. Qari Xoaib Bajauri, un naut responsable dels talibans paquistaneses, a assegurat que lo grop mirava desenant las fòrças paquistanesas, que considèra coma un “càncer per tota aquela region”. Bajauri a negat tot sosten dels talibans afgans, mas a reconegut que de mojahidins paquistaneses, que combatèron en Afganistan, èran tornats en Paquistan.

En despièch de las tensions creissentas, cèrts responsables afgans e paquistaneses an cercat d'engatjar un dialòg. La meteissa setmana ont Paquistan ataquèt d’objectius dins l'èst d'Afganistan, un representant especial de Paquistan vesitèt Kabol per dialogar amb Sirajuddin Haqqani, ministre de l'interior per interim del govèrn taliban. “Aquel eveniment mòstra que los talibans son tanben conscients de l'importància del dialòg”, çò explica Muhammad Amir Rana, analista en seguretat paquistanés. Malgrat aquò, Islamabad dobta de l'engatjament real dels talibans a negociar.

La situacion, doncas, demòra tibada e malsegura, transformant la termièra entre Paquistan e Afganistan en un dels novèls foguièrs de conflictes en Asia.