Dempuei doas annadas, un Cafè Òc recampa de personas afogadas per la cultura e la lenga occitanas e qu’an enveja de l’aprene e de la parlar dins un ambient simpatic. Venon de Carcassona o deis environs amb plaser.

Doas sòcias de l’IEO 11, Eliana Pignol e Brigida Viginier, s’encargan d’organizar aquela activitat que ne fuguèron a l’iniciativa. Mercé en elei!

Fuguèt l’ostau de quartier de la Barbacana qu’aculhiguèt au primier estanci lei participants e que contunha de nos i aculhir.

A l’ora d’ara, un vintenat de personas se recampan lei segond e quatren dijòus de cada mes a 18h30 per partejar un bon moment.

L’objectiu es de parlar la lenga occitana sus un tèma causit a la fin d’un Cafè Òc per lo seguent. Cadun i pòu venir amb çò que preparèt: un tèxt creat, un extrach de libre, un poèma, un cònte, un sovenir o un projècte. Lo banh de lenga fonciona ben e cadun pòu participar a la discussion que s’installa. L’essenciau es de parlar mai que mai, cadun dins «son occitan» e lo principau es d’èstre acceptat. (ieu la nimesenca ne siáu un exemple.). L’interdialectalitat es una riquesa.

Lei participants son de tot atge amb pasmens una majoritat de retirats.

Tot es fach oralament, amb distribucion de tèxts legits, de còps que i a, e la sequéncia dura una bòna ora. Aquelei que sabon pas encara parlar profichan d’aqueu temps d’impregnacion per s’enriquir e un jorn prenon enfin la paraula, ajudats per leis autrei, ja locutors confirmats.

Lo moment conviviau

Après aqueu temps de paraula vèn lo temps de la convivialitat a l’entorn d’una «aubèrga occitana» ont cadun pòrta quauqua ren de bòn de partejar per manjar ò beure.

Lei convèrsas contunhan amb lei mangiscas preparadas per lei cosiniers ò cosinieras que regalan totei lei participants. Pendent una ora de mai, cadun dins la bòna umor se regala!

Coma a l’ora d’ara la lenga s’ausís rarament per carrieras, la fau retrobar autra part e en mai deis activitats culturalas occitanas nombrosas en Aude, vesèm amb plaser que lo Cafè Òc recampa de participants novèus qu’an enveja de faire viure nòstra lenga e nòstra cultura. Es una capitada dei bèlas.

Lei condicions d’inscripcion son un escotisson de 15 èuros a l’Ostau dau Quartier de la Barbacana. (carriera Barbacana a Carcassona).

Per mai d’entresenhas +33(0)6 11 35 49 13