Pel primièr còp de son istòria, lo partit ultradrechista Alternativa per Alemanha (AfD) presentarà oficialament un candidat a la cancelariá, çò rapòrta Euronews. Serà exactament una candidata, Alice Weidel, causida pel partit ultranacionalista per lo representar a las eleccions legislativas del 23 de febrièr venent. Lo dissabte 11 de genièr passat, pendent un congrès a Riesa, l’AfD confirmèt sa nominacion.

Mentre que l’extrèma drecha es tradicionalament marginala en Alemanha dempuèi la casuda del regim nazi, aquel partit benefícia d’ara enlà d’un sosten creissent dins los sondatges, motivat per una dinamica de refortiment de sa popularitat, sostenguda manifèstament pels miliardaris reaccionaris Donald Trump e Elon Musk. Divendres passat, Weidel participèt a una entrevista amb Musk, que li oferiguèt una visibilitat mediatica màger. Pendent aquel escambi, Musk li permetèt de respondre a de questions sus de subjèctes coma Israèl e las acusacions d’extremisme contra son partit, l’AfD. Weidel defendèt l’ideologia de son partit en la presentant coma “conservatritz e libertària”, e en rebutant las comparasons amb lo nazisme.

Alice Weidel, de 45 ans, es ça que la coneguda per son discors dur sus la seguretat interiora, que l’assòcia, coma o fa tostemps l’extrèma drecha, a l’immigracion. Se definís coma eurosceptica e crei en la necessitat de suprimir l’èuro e de far sortir Alemanha de l’Union Europèa, se i a pas de prigondas reformas. Mai paradoxalament, es una de las raras femnas a dirigir un partit majoritàriament masculin e virilista, e s’aficha dobèrtament coma omosexuala.

Pasmens, l’ascension de l’AfD fa pas l’unanimitat. A Riesa, de milièrs de manifestants exprimiguèron lor oposicion, e d’unes bloquèron los accèsses al congrès, çò que retardèt son aviada. Los manifestants denonciavan l’extremisme del partit, en brandissent d’eslogans coma “Kein bock auf nazis” (“Volèm pas de nazis”).

Malgrat una popularitat creissenta, l’AfD, segon los analistas, a pas que paucas possibilitats de governar, ja que cap d’autre partit es pas prèst per collaborar amb el. Los sondatges balhan la victòria a Friedrich Merz, de l’Union Crestiana-Democrata (CDU), qu’obtendriá lo 30 % de las voses. L’extrèma drecha de Weidel recoltariá entre los 18 e 21 % dels sufragis. Pertocant lo Partit Socialdemocrata (SPD) de l’actual cancelièr Olaf Scholz, obtendriá pas qu’entre los 14 e 17 % dels vòtes.