Dissabte passat, se tenguèt a Bilbao una granda manifestacion qu’exigissiá la fin de las mesuras excepcionalas aplicadas als presonièrs bascos, çò rapòrta Vilaweb. Segon los organizaires, Sare Herritarra, i a actualament 142 condemnats en ligam amb l’ETA, dont fòrça deurián ja èsser liures s’èran tractats coma los autres presonièrs, segon la legislacion ordinària. L’objectiu d’aquela marcha èra de demandar la fin definitiva d’aquelas mesuras especialas. Es pas lo primièr cop que s’organiza una concentracion contra las mesuras excepcionalas: en genièr de 2023, de milierats de personas ocupèron ja las carrièras de Bilbao sus aquela premissa.

La manifestacion traversèt lo centre vila, en cap de la quala se trobavan de figuras emblematicas talas coma la victima de la violéncia d’estat Ane Muguruza, l’èx-director del jornal Berria Martxelo Otamendi, o encara l’activista saharauí Garazi Hach Embarek. Tanben i eran presents de representants politics de divèrses partits bascos, coma EH Bildu e Sortu. Los organizaires estimèron que la manifestacion amassèt mai o mens 60 000 personas.

Joseba Azkarraga, pòrtaparaula de Sare Herritarra, cridèt l’administracion penitenciària basca a aplicar sens retard la progression de las penas e a permetre que los presonièrs purgan lor pena en defòra de las presons. Insistiguèt sul fach qu’aqueles presonièrs avián ja purgat pro de temps e que de solucions devián èsser trobadas, sens oblidar lo sosten necessari a las victimas de las violéncias passadas.

La jornada se debanèt dins un ambient a l’encòp revendicatiu e festiu, amb de trikitilaris (acordeonistas tradicionals) e gigants qu’animavan la marcha malgrat la pluèja.