Dissabte de vèspre, 80 000 espectators assistiguèron a Wembley a la finala de la Cup. La pluèja èra al rendètz-vos e convidèt pas a d’atacas liricas o d’envoladas romanticas, mas a un jòc seriós entre Wigan e Hull FC.
 
Los Combatents de Wigan dominèron la partida, amb una possession de la pauma e una ocupacion del terren superioras a Hull que multipliquèt las fautas de man (setze en tot) e manquèt mai que mai d’inspiracion. Dins lo primièr temps, òm s’acontentèt d’un ensag del centre Tornley sus una pauma arpatejada. Transformacion de son collèga de la linha d’ataca Richards: 6-0 a la pausa per Wigan. A la represa, Richards ensacava doas penalitats consecutivas a de placatges nauts. L’arrièr d’Hull s’escapava sus 80 mètres, mas l’alièr Charnley capitava de li far sautar la pauma de las mans. E a la còrna, l’arrièr Sam Tomkins sus una passa al pè passava en revista la defensa d’Hull per s’espatarrar al pè dels pals. Richards transformava e Wigan podiá joslevar un còp de mai la famosa Cup.
 
Originalitat: Wigan ten doas Cups aquesta sason, la de fotbòl e la de XIII!
 
La dimenjada venenta, la Superliga coneisserà son abansdarrièra jornada de la fasa de classament. Divendres de nuèit, los Dracs aniràn desfisar los Rinocèros de Leeds e una victòria seriá plan per considerar la tenguda de la primièra partida de las pelhòfas a Brutus, sustot se Warrington va ganhar a Saint Helens.
 
 
Revista de l’Elèit
 
D’aquel temps, en Occitània las esquipas d’Elèit 1 son en fasa de preparacion en vista de la represa del campionat los 21 e 22 de setembre.
 
Se sap, e se regrèta, que lo campion Pià serà pas mai de la partida. Los Pianencs se son esperdigalhats dins las autras formacions: Gressèque, Soubeyras e benlèu Vaeau a l’AS Carcassona, los fraires Bentley a Tolosa, Mayans de retorn a Limós, Stacul e Cooper a Lesinhan, Comtat a Avinhon.
 
A Carcassona, lo centre internacional papó Dan Aye jogarà a la fin de la Copa del Monde e quatre juniors locals son titularizats en esquipa primièra.
 
A Lesinhan, Vaha Pulu, que remplaça son cosin Fifita, e lo pilar d’Hull KR Ryan O’Hara seràn en primièra linha. Bigat e Benausse tornan d’una malaventura quinzista.
 
A Limós, formacion que serà entraïnada pel parelh Teamata-Taylor, se fa rampèl als ancians Dracs: l’enfant del país David Ferriòl, mas tanben Client Greenshields e Casey MacGuire. Alexis Albérola, Loïc Taurin e Francés Thérésin an pres la bilheta de la michelina Carcassona-Limós.
 
Se parla tanben d’un segonda linha australian e d’un centre neozelandés.
 
Tolosa a totjorn pel cap de tornar jogar dins lo campionat anglés: vei lo retorn de Greg White e fa signar Aaron Wood d’Avinhon e Pèire-Loís Borrèl de l’Estadi Tolzan.
Avinhon voldrà confirmar sa victòria en Copa amb lo papó Guammbo coma menaire de jòc e l’internacional american Mark Offerdhal dins los avants.
 
Pas de revolucion de palais cò dels Dragonets, los finalistas maluroses de mai; ça que la Cyril Gossard pren la plaça de Luke Swain dins lo ròtle de l’ancian. Palau, lo novèl vengut catalan, farà sas classas amb lo Nicolau Munoz a la bagueta e es a la recèrca de joves angleses.
 
Pas de revolum cò dels Laupards d’Aquitània de Vilanòva: per assanir la situacion financièra, lo club s’apiejarà sus sos joves. La competicion s’anóncia plan dobèrta dins aquesta sason de transicion amb una formula de campionat en tres temps e l’espèr (una especialitat tretzista) de retorn a una pola unica d’almens 10 esquipas per la sason venenta.
 
 
 
 
Alan Roch