Aquesta dimenjada, avián luòc las partidas de la primièra jornada de la fasa venir del Super-XIII. Doas partidas s’acabèron d’un biais non previst:

• dissabte, se balhava pas car de las possibilitats de Lesinhan de batre los Dragonets. Miracle de l’espòrt e de la volontat collectiva, los Molinièrs an dominat los catalans: 2812. La dintrada del jogaire australian de Leeds Paul Momirovski es positiva e Jordan Flovie punta tres ensages.

• dimenge, Carcassona anava jogar a Vilafranca de Roergue qu’aviá perdut en Copa cò de la resèrva dels Canaris, VilagalhencAragon. En tota logica……… Mas los Canaris se mostrèron plan maladreits e plan indisciplinats (5 penalitats encaissadas) e perdèron: 1220.

Dins las autres rescontres: dissabte a Limós, dins una partida que prenguèt pas jamai d’ample, los locals batián Vilanòva 18-6. En serada, a Albi, sus un terren e amb un temps a metre pas un jogaire defòra, los Tigres dominavan Pià 26-10. Dimenge, Sent Gaudenç dominèt Avinhon: 38-18.

Aquesta dimenjada venenta, Carcassona serà al repaus e se jogarà las partidas:

• dissabte: AvinhonAlbi; Dragonets-Limós, Tolosa-Lesinhan

• dimenge: VilanòvaSent Gaudenç e Pià-Vilafranca.

A taula!

Dins las taulejadas d’avantpartida, i aviá de segur un Limós (la còca dels Reis locala) a Limós e un caçolet a Lesinhan. Sopa del campèstre amb gratèus e manchons de tiron a Vilafranca. Vilanòva anóncia de magrets de tiron abans lo rescontre amb Sent Gaudenç.

Los quarts de finala de la Copa

Divendres de ser, dins los locals de L’Indépendant a Perpinhan, los jogaires dels Dragons Tèo Fages e Tevita Pangai Junior an tirat al sòrt las oposicions pels quarts de finala de la Copa Lòrd Derby de jogar los 8 e 9 de febrièr.

Limós qu’aviá jogat un dèrbi a Lesinhan prendrà la direccion de Carcassona.

Vilanòva qu’a eliminat Pià reçauprà d’autres catalans: los Dragonets.

Lo VARL a una possibilitat bèla d’arribar en mièja finala en recebent Tolosa que ja eliminèt fa qualques annadas.

Albi serà favorit dins son desplaçament a Carpentràs.

Superliga: Los Diables Roges dins lo roge

En Superliga, es la crisi del costat de Salford: los comptes dels Diables Roges son plan mai que dins lo roge. La Superliga autoriza lo club de se separar de jogaires e convida las autras formacions de faire lor mercat fòra los critèris costumièrs de quòta e de limitacion dels salaris. Una avança de 500 000 liuras es estada autrejada a la formacion, mas es pas sufisenta per tapar lo trauc.

La question grèva que se pausa es la de la possibilitat del club de persègre son camin dins aquelas condicions. De seguir…

A Perpinhan, los Dragons Catalans lançaràn lor sason amb una serada al Palais dels Congrèsses aqueste dimècres 22 de genièr. Al programa: los vòts del president, la presentacion dels tres malhòts de la sason, la presentacion de l’efectiu e la difusion de   vidèos originals.