Las escòlas Bressola, qu'òbran per l'ensenhament immersiu en catalan en Catalonha Nòrd, se tròban dins una situacion financièra preocupanta, çò rapòrta Vilaweb. Davant una “rompedura de liquiditat" anonciada pel mes de mai, an sollicitada una ajuda immediata de las administracions localas, sustot del departament dels Pirenèus Orientals e de la region qu'a pres lo nom d'Occitània. Se recebèsse pas pro de sosten, l'associacion se poiriá veire constrencha de barrar d'unes de sos centres escolars o d'aumentar las còstas d'escolaritat per las familhas.

Lo president de la Bressola, Guillem Nivet, a mesas en lum las causas d'aquela crisi, sustot l'inflacion e la manca de finançament public recurrent. A l'ora d'ara, l'associacion dispausa d'un budget de 4,5 milions d'èuros, dont una part bèla es cobèrta per las familhas e l'associacion ela meteissa. Las subvencions de las institucions publicas son feblas, representant solament l'1,1 % del budget global pel departament dels Pirenèus Orientals e lo 2,6 % per la region. En mai d’aquò, la municipalitat de Perpinhan, governada per l’extrèma drecha, a suprimida son ajuda de 60 000 èuros, tot en aumentant las cargas amb d’impòstes sus l’associacion. “Es un moment plan dur que traversam. Nos sentèm abandonats. En 2026, l'escòla aurà 50 ans e sèm pas segurs d'i poder arribar”, çò alèrta Nivet.

Se cap de solucion es pas trobada dins las semanas venentas, la Bressola poiriá organizar una manifestacion lo 15 de març a Perpinhan per revendicar una ajuda mai substanciala, exigissent de contribucions publicas que representen almens lo 5 % del budget total. L'avenidor d'aquela escòla, qu'aculhís 1100 escolans e emplega 110 trabalhadors, depend d'ara enlà de l'implicacion dels poders publics dins sa subrevivéncia.