Actualitats
Rugbi XIII. "Sèm campions! Sèm campions! Avèm ganhat lo campionat": Carcassona pòt cantar
L'AS Carcassona a ganhat lo campionat de França de Rugbi XIII
Lo boclièr del trofèu Max-Rousié es de retorn vint ans aprèp. Ça que la, dissabte, dins la calor d’un vèspre de prima, a l’Egassieral de Narbona, las causas avián plan mal començat pels canaris. Sus la primièra cadena de tenguts dels Pianencs, Porter jogava aprèp lo cinquen a la man, trapava a nautor Gressèque qu’anava marcar e ajustava la transformacion. Lo debat s’equilibrava abans que Swain vengue faire lo surnombre sus sortida de mescalanha per mandar Gregòri Mazard a l’ensag. Guiraud transformava e Carcassona egalizava.
Lo pilar fidjian dels Occitans, Osea Sadrau, trapava un trauc dins la defensa catalana per puntar l’ensag, transformat el tanben. A la còrna, aquel diable de Gressèque fialava al ras del tengut e ramenava la marca a 12-10. A la represa, lo combat dels avants repreniá amb una intensitat bèla.
Carcassona fasiá parlar sas fòrças e Pià s’usava a defendre. Lo pilar canari Romaric Bembà anava marcar dos còps: un primièr còp en fòrça, faguent la perinqueta amb dos o tres catalans sus l’esquina, lo segond a la recuperacion d’un còp de pè del mesclanha Hillen, arpatejat per la defensa advèrsa.
Carcassona menava 26-10 e demorava un quart d’ora de jòc. Coma tròp sovent, la paur de ganhar s’emparava de la tropa occitana que se metiá a faire decas, pichonas e grandas, d’aqueles qu’acaban per tornar metre l’oposicion en fisança. Atal, los Pianencs anavan marcar dos còps: un per l’avant Vaeau (transformacion de Gressèque), l’autra en cap de linha pel centre Mayans.
Carcassona menava 26-20, la diferéncia d’un ensag transformat. L’arbitre de tòca e la videò demandada per l’arbitre central invalidavan un ensag de l’alièr Sobeiràs. Èra tròp tard: Pià tornariá pas a la marca. E la còrna desencadenava los crits de jòia, las lagremas e los rires dels jaune e negre que montavan dins la tribuna se faire remetre lo boclièr pel president de la Federacion.
La finala se la son ganhada en equipa, en se sarrant los coides, amb las tripas e la sanqueta, la nhaca e la solidaritat.
De retorn en vila, aprèp una recepcion a la Comuna, la fèsta foguèt bèla plaça de las Èrbas.
En juniòr, calguèt espepissar lo règlament per designar lo venceire d’una partida que s’acabèt sus la marca de 26 pertot entre Carcassona, lo favorit, e Lesinhan. Meteis nombre d’ensags, pas de carton roge, meteis nombre de penalitat: los tombats de Lesinhan faguèron la decision e l’equipa de Corbièras s’emportèt lo titre.
Dimenge 20, a Narbona tornar, a 13h pels junìòrs en Copa Nitard entre Lesinhan e Carcassona e a 15h30 per las equipas d’Elita en Copa Lord Derby entre Carcassona e Pià serà l’ora del revenge o del doblat. Coma èra pas la dimenjada dels Catalans, dimenge, sus lor pelena de Brutús, los Dracs pleguèron botiga en quart de la Cup fàcia asa Lops de Warrington qu’avián las dents mai longas e l’enveja mai fòrta per s ‘impausar 32-22. Los sang e aur son passats a costat de la partida e dintran pas dins lo carrat relevat de las mièja-finalas ont, sul camin de Wembley, Leeds, Wignan e Huddersfield acompanharàn Warrington.
Dimenge, pel compte de la Super-Liga, los Dracs deurián tornar trapar lo camin de la victòria del costat de Widnes. Dimars 8 de mai, se tenguèron las finalas de las competicions femininas a Carcassona: en Division 2, la formacion de Factura-Beglas ganhèt fàcia a Lescura d’Albigés e en division 1, sus la fin d’una partida agradiva e disputada, Marselha passèt davant Tolosa-Ovalia.
Lo mes de mai, las escasenças mancan pas de sortir las bandièras, las còrnas, las masquetas, los camisets e los malhòts de son equipa per plan se dire (e viure) lo rugbí qu’es una fèsta vertadièra! o La finala de la Copa Lord-Derby entre Carcassona e Pià serà retrasmesa en dirècte e en occitan sus Ràdio-Lenga d’Òc-Narbona aqueste dimenge 20, a tres e mièja del vèspre (95,5 mhz). L’estacion passa cada jorn duscas a dissabte 19 (10h, 14h e 17h), una cronica : Narbona, capitala del tretze.
Alan Roch
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Lo reportatge de TV-Carcassonne :
http://www.dailymotion.com/video/xqtgzs_champions-de-france-en-battant-pia-26-a-20-samedi-a-narbonne-l-asc-xiii-remporte-la-finale-du-champi_sport?start=1077
E en vèrses, del biais de al scronicas d'un còp èra,a quò balha aquesta ÒDA AL BOCLIÈR :
Ressonatz, trompetas !
Dançatz, Pomponetas !
Lo boclièr es plaça de las Èrbas
E l’esperit de Felix ne ritz :
Avèm ganhat ! Avèm ganhat !
Sèm los campions !
A las cinc oras del vèspre,
Sul pelhenc maienc de l’Egassieral,
L’ombra trista de las aurelhas
Dels borrons pianencs s’alonga :
Lo capitani Teddí joslèva lo boclièr
E tota l’equipa parla als àngels
Los còps de pè del Guiraud menèron
A las jeremiadas catalanas,
Stuart voliá plan venir rei de França,
Del costat de Tomàs, èra barrat a clau,
Lo Gregòri, sèm acostumats, i anèt de son ensag
E son companh Nicolau perdèt jamai l’esper
Russel-Eamon, los dos mièges fan lo parelh
Per menar lo jòc de la man, del pè, de l’uèlh e de la votz
Del costat de Swain, òm s’acontenta pas
De magdalenas, cal tanben de caramèls
Lo Florenç demorèt dur coma un ròc d’Argon,
Jonatan arrestèt pas d’avançar, de passar, de placar
De placar, de passar e d’avançar
E lo Francés prenguèt lo relai coma cal
Las sabradas d’Amar maquèron l’adversari
Que tremolava quand passava lo tifon Tyrone
Seguit per Upu que canturlejava " Coma un auragan ! "
Per son ensag e l’ensemble de son òbra,
Sadrau s’amerita plan un Oscar
E Romaric Bemba faguèt lo pic e lo repic
Darrèr la linha blanca divenca.
Se sarrar los coides, la nhaca, lo vam, la solidaritat,
L’inventivitat, l’inspiracion, la volontat, l’esperit :
Tot i èra !
Un còp de còrna que fa grand ben :
Una linha de mai sul boclièr del Max-Rousié
E dins la legenda tretzista
Ne portam totes una tenguda de serada
Roman, lo faidit, ne soritz, la medalha al còl
Sul banc, Banet ven bon coma lo pan
E Patona Albèrt se demanda quala es la fèsta mai bèla :
La victòria o lo bufa-li de Ladèrn ?
Magali, presidenta tant-aimada, e Joan-lo-Mètge
An lo còr que pata-pataqueja : ASC ! ASC ! ASC !
Vint-e-siès a vint ! Braves Pianencs,
Es nosaus que bevèm lo vin.
Jogaires, la victòria es bèla
Mas vos farem pas d’estatuas al Panteon.
Non, comptam de vos veire sul tarrenc
Lo dimenge qu’arriba e l’an que ven !
Ressonatz, trompetas !
Dançatz, Pomponetas !
Lo boclièr es plaça de las Èrbas
E l’esperit de Felix ne ritz.
Las Gaujosas Canarias an tuat lo pòrc
Per preparar las sietas d’afogassets,
La jòia e lo bonur lusisson dins los uèlhs,
Avèm ganhat : sèm los campions !
Lo vin es gaujós, las minas risolièras,
La musica pòt plan faire virar en redond :
Anuèit, la Tèrra es… ovala !
L’Alan
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari