Lo 22 d'octòbre passat, lo deputat Nicolas Metzdorf (Renaissença) interpelèt la ministra dels espòrts, Marie Barsacq, pertocant l'utilizacion de la bandièra independentista del Front de Liberacion Nacionala Canac e Socialista (FLNKS) per representar Canaquia pendent las competicions esportivas internacionalas, çò rapòrta Outremer 360. En responsa, lo Ministèri a precisat que, fauta de bandièra comuna, sol lo drapèl tricolor es autorizat pels eveniments internacionals. En mai d’aquò, la bandièra del Comitat Territorial Olimpic e Esportiu de Nòva Caledònia (CTOS), utilizada pendent los Jòcs del Pacific, es tanben validada.

Lo Ministèri dels Espòrts a insistit sul fach que, malgrat que la lei organica permeta als canacs de causir lors signes identitaris, cap de consens es pas estat trobat per adoptar una bandièra comuna. Aital, la bandièra tricolora demòra l'emblèma oficial per totas las competicions internacionalas a las qualas participa Canaquia.

Aquela posicion es estada saludada per Nicolas Metzdorf, que milita dempuèi mantun mes contra la reconeissença del drapèl de l'FLNKS. En julhet, aviá ja demandat a la justícia de retirar aquela bandièra del permés de menar canac, una decision que lo validèt lo tribunal administratiu mas que foguèt pas jamai aplicada.

Dins un comunicat del 15 de genièr, lo deputat macronista exprimiguèt son espèr que lo futur govèrn de Canaquia respectèsse aquela decision judiciària, e reafirmèt son engatjament a obrar per dotar de «signes identitaris comuns totes los caledonians». Metzdorf, d’ideologia antiindependentista, nasquèt a Nèkö, en Canaquia.