Aqueste dissabte, Lesinhan s’es vist las pèiras per ganhar a Tolosa 22-18 que marca atal son segond punt de la sason al classament mercé al bònus defensiu. A Sant Estève, los Dragonets prenon la volada dins lo segond temps per batre Limós 26-16.

Dins una partida jogada a Carpentràs, Albi fa tanben la diferéncia dins lo segond temps fàcia a Avinhon: 30-4. En seguida en Elèit 2, Carpentràs es plan mai fòrt que l’Escura: 58-4.

A Pià, la vesprada de dimenge se dobriguèt pel rescontre d’Elèit 2 entre Palau e Realmont (victòria de Palau: 38-0), puèi Pià recebiá los Lops de Vilafranca. Los catalans demorèron mèstres a l’ostal: 50-24.

A Vilanòva, los Orses de Sent Gaudenç èran encara en ivernacion e pèrdon 16-40.

Carcassona entamena una tièra de tres dèrbis: a Lesinhan aqueste dissabte 25; fàcia a Limós lo dissabte 8 de febrièr en Copa e lo dimenge 16 de febrièr en campionat.

Al programa tanben d’aquesta jornada de Super-XIII: Limós-Tolosa e Albi-Vilafranca se jogaràn dissabte; St Gaudenç-Dragonets dimenge. Avinhon-Vilanòva se disputarà dissabte 1r de febrièr.

Identitat e rugbi

Saludarem aicí l’esquipa de XV de Gwenedque, per son rescontre contra una formacion escocesa en Challenge europèu, faguèt cantar l’imne breton, lo Bro gozh ma zadoù, per l’Alan Stivell e los jogaires foguèron aculhits sus la pelena per un bagad. Los sostens brandisson fòrça gwen ha du. Aquela presa en compte e expression de l’identitat es un exemple bèl pels clubs occitans, catalans, bascos…

Rugbi transfrontalièr

Per jogar las partidas d’aqueste dimenge 19 de genièr, los Andidragons an passat las termièras del País Catalan per disputar los rescontres en territòri occitan a Leucata .

Taulejada locala

Abans lo rescontre Sent Gaudenç/Dragonets d’aqueste dimenge 26, los Orses prepausan una taulejada amb mongetada, salsissa, formatge pirenenc e la còca dels Reis. A Vilafranca de Roergue, lo dissabte 1r de febrièr, serada ecumenica de las esquipas de XIII e de XV (ça que la dins la sala de las tretze pèiras!) per una nuèit del rugbi (la primièra de l’istòria): carnsalada, custòdias de tiron, gratèus, fritas, formatges!