Marselha es jol tust après la mòrt tragica de quatre sens-abrics en una setmana, victimas probablament del freg glacial qu’a atench la vila, çò rapòrta Libération. Aqueles decèsses an agut luòc en plen centre vila, metent en lum l’urgéncia d’una melhora presa en carga de las personas vulnerablas. Las còlas de terren, coma lo SAMU social, soslinhan la necessitat d’aumentar lo nombre de plaças d’albergament, en particular per las personas annadidas o malautas.

Un òme es estat retrobat mòrt a l’intrada de la bibliotèca de l’Alcazar, après una intervencion dels pompièrs de la marina qu’an confirmat son decès per ipotermia. Un autre òme es defuntat d’un arrèst cardiac a la gara Sant Carles. Una femna d’una seissantena d’annadas es estada retrobada mòrta per ipotermia près de la plaça Castelhana. En mai d’aquò, un òme sonat José, conegut de las associacions, es el tanben defuntat recentament, mas los detalhs de sa mòrt demòran encara foscas.

Malgrat los esfòrces de las associacions e dels benevòls, la situacion demòra critica. Cada nuèch, de centenas de sens-abrics luchan per trobar un endrech ont dormir. Las plaças d’albergament son saturadas, e fòrça d’entre eles se retròban dins de situacions precàrias, avent quitament pas accès a un teulat, fauta de plaças disponiblas. Las autoritats localas an reagit en dobrissent de lièches d’urgéncia, mas aquelas solucions son temporàrias e insufisentas davant l’amplor de la crisi.

Los actors de terren insistisson sus la necessitat de politicas publicas mai adaptadas e mai ambiciosas per garentir un albergament digne a totes los que n’an besonh. Segon France 3, Marselha compta a l’ora d’ara 7500 plaças d’albergament, dont 402 son estadas creadas e cofinançadas per la vila dempuèi 2021. Un dispositiu insufisent per respondre als besonhs de las 16 000 personas sens abric recensadas en 2022.