Lo projècte d’una escultura monumentala de Joana d’Arc a Niça a desencadenat una longa controvèrsia. Tot comencèt en novembre de 2023, quand lo jornal Nice-Matin revelèt que la societat publica de parcatges Régie Parc Azur aviá adjudicat dirèctament, sens concors public, un contracte de 170 000 èuros a l’Atelier Missor, un collectiu artistic associat a de movements d’extrèma drecha identitària. Aquela decision foguèt defenduda pel responsable del projècte, Gaël Nofri, que n’escartèt tota connotacion ideologica.

En febrièr de 2024, lo prefècte dels Alps Maritims portèt lo cas al tribunal administratiu per questionar la legalitat del contracte, mas la justícia refusèt de lo suspendre. Fin finala, l’impausanta estatua de bronze, de nòu tonas, s’inaugurèt lo 23 d’octòbre de 2024.

Totun, lo 14 de genièr de 2025, lo tribunal anullèt lo contracte per aver pas respectat las obligacions de publicitat e concurréncia. Segon la senténcia, i aviá pas pro de rasons artisticas per justificar l’adjudicacion exclusiva. La decision judiciària obliga de desmontar l’estatua e remborsar l’argent pagat.

Recobrar lo nom de Font Cauda pel quartièr

A l’endeman de la senténcia, l’Assemblada Occitana del País Niçard emetèt un comunicat per criticar durament lo projècte. Lo collectiu occitanista met en causa lo còst elevat de l’estatua e la manca de prioritat de la despensa en relacion amb los besonhs de la populacion. A mai, planh que Joana d’Arc siá una “eroïna mitologica francesa qu’a pas minga rapòrt emb l’istòria dau País Niçard” e demanda que “lo quartier repilhe lo sieu nom istoric de Fònt Cauda”, mentre que lo quartièr pòrta oficialament lo nom de l’eroïna francesa. Segon lo comunicat, l’autentica eroïna de Niça es Caterina Segurana.

Mentretant, Régie Parc Azur a anonciat que depausarà un recors contra la decision judiciària. Parallèlament, lo cònsol màger de Niça, Christian Estrosi, a impulsat una campanha de finançament popular per manténer l’escultura, en demandant la collaboracion ciutadana. La polemica es totjorn dobèrta.