La victòria electorala de Donald Trump als Estats Units es marcada pel ròtle clau dels influenciaires de l’internet qu’an de milions de seguidors, coma Joe Rogan, Theo Von o Adin Ross. Els difusan las idèas trumpistas sus de plataformas coma YouTube e Kick. Aqueles creators de contengut, coneguts per lors opinions d’extrèma drecha e, en fòrça cases, conspiracionistas, an autrejat a Trump una nòva draia per aténher un public jove e consolidar sas politicas masclistas, omofòbas e transfòbas, xenofòbas e antienvironamentalistas.

Pendent la campanha, Trump apareguèt dins divèrses podcastes e de vidèos, coma lo de Joe Rogan, lo mai escotat a Spotify. Dins una d’aquelas intervencions, qu’obtenguèt mai de 50 milions de visualizacions, Trump minimizèt lo cambiament climatic, en qualificant los scientifics de "paures imbecils". Rogan ensagèt de nuançar mas lo contradiguèt pas, çò rapòrta Reporterre.

Segon d’expèrts coma Valérie Masson-Delmotte e Albin Wagener, aquel usatge dels influenciaires permet al miliardari fascizant d’esquivar los mèdias tradicionals, que son mai critics e serioses. Aital a carta blanca per propagar de messatges simplistas e manipuladors que genèran de dobtes, e se favorís la disseminacion de son discors violentament reaccionari.

Amb aqueles sostens, Trump a pas solament ganhat las eleccions, mas tanben la batalha culturala, mentre qu’una generacion de joves, expausats a aquelas idèas, aurà d’afrontar las consequéncias d’una politica contrària a la proteccion dels dreches socials e de l’environament.

Una aliança de movements de joves progressisas

Mentretant, una trentena de vilas europèas an conegut de mobilizacions per rebutar l’espandiment de l’extrèma drecha e las politicas ecofòbas. Coneguts coma The Surge (l’Aviada ; en catalan se dison l’Embranzida), se mobilizan per l’environament, contra las guèrras e lo genocidi del pòble palestinian, çò rapòrta Directa.