Dimenge passat, pel primièr còp après catòrze meses, la lista de Gaza experimentèt un silenci insolit amb l’intrada en vigor d’una trèva de sièis setmanas entre l’Hamas e l’armada d’Israèl. Après totes aqueles meses de bombardaments constants, los abitants an començat de quitar los refugis. Ara lors ostals se tròban destruches. La devastacion es terribla, çò rapòrta The Washington Post.

Las scènas de celebracion per carrièras contrastan amb la destruccion: las bastissas son de tarcums, las familhas i cèrcan de còrses e la populacion es marcada per de pèrdas irreparablas. Segon lo Ministèri de la Santat de Gaza, mai de 46 900 personas son mòrtas e 110 750 son estadas feridas pendent lo conflicte, la majoritat de femnas e de mainatges.

La vila de Rafah es una de las mai devastadas, amb lo 60% dels abitatges destruches. Lo cònsol màger, Ahmad Sofi, descriu la situacion coma “inabitabla” e demanda l’ajuda internacionala per rebastir d'infrastructuras essencialas.

Israèl persistís en Cisjordania

Malgrat la trèva, l'incertitud persistís. Israèl manten de tropas a las frontièras e a avertit que reprendrà los atacs se l’alta al fuòc se respècta pas. Mentretant, en Cisjordania, l’armada israeliana a intensificat las operacions militaras, en metent en evidéncia que lo conflicte es pas resolgut.

Los mediators internacionals asseguran qu'aquel periòde de patz temporari permetrà d’avançar devèrs una solucion duradissa, mas la situacion complica lor optimisme.