La societat chinesa DeepSeek es arribada amb fòrça dins lo sector de l’intelligéncia artificiala e es venguda la primièra en descargaments de l’App Store, tant en China coma als Estats Units. DeepSeek s’es presentada amb un modèl innovant de còde dobèrt, de bas còst e d’una nauta eficiéncia que la fa venir lo principal concurrent de las grandas societats tecnologicas estatsunidencas coma OpenAi.

Lo modèl DeepSeek-R1, lançat lo 20 de genièr, se destaca per sa capacitat de resòlver de problèmas matematics, de programacion e d’inferéncia de lengatge natural. Amb un còst de desvolopament de solament 5,57 milions de dolars, fòrça inferior a sos rivals, que los escomet DeepSeek per una tecnica d’aprendissatge automatic extrèmament eficienta.

Aquel succès a agut una repercussion immediata suls mercats financièrs, amb de casudas de mai del 12% en accions de societats estatsunidencas coma Nvidia, e a menat lo Nasdaq a de pèrdas superioras al 4%. Las borsas europèas an tanben patit de reculadas significativas.

Lo còde dobèrt de DeepSeek suscita un grand interès, pr’amor que permet als desvolopaires del Mond entièr d’adaptar lo modèl. A mai, prepausa de servicis a un còst revolucionari de 0,14 dolar per milion de tokens d’intrada, fòrça en dejós dels 15 dolars d’OpenAI.

Malgrat sa reüssida, DeepSeek escapa pas a la censura del govèrn chinés, que limita las responsas del modèl en tèmas politics sensibles. Aquela realitat a pas empedit que la companhiá venga un simbòl de la poténcia de China dins la corsa mondiala per l’intelligéncia artificiala.