Lo 26 de genièr passat, Manuel Valls acordèt una entrevista al jornal Ouest-France per parlar de la situacion de Maiòta, devastada pel ciclòn Chido en decembre. L'ancian primièr ministre socialista, vengut ministre de las collectivitats d’otramar amb lo govèrn Bayrou, profechèt de l’entrevista per far de duras declaracions contra l'immigracion, que qualifica de “flagèl” que “necròsa” l'illa.

Valls afirmèt que l'immigracion irregulara èra lun dels principals problèmas de Maiòta, precisant que lo 50 % de la populacion, dont una majoritat d'estrangièrs sens papièrs, “pesa sus la vida vidanta dels compatriòtas” dels franceses. Per el, aquela situacion crida una politica “plan ferma” envèrs las Comòras, d'ont provenon fòrça immigrants locals. Insistiguèt tanben sus la necessitat d'afortir los mejans de deteccion de las intradas illegalas e prepausèt d'aumentar lo nombre de reconduchas a la frontièra de 25 000 a 35 000 per an.

Valls defendèt sa posicion en afirmant son sosten a la revision de la “circulara Valls” de 2012, que descriu las modalitats de desliurança dels títols de sojorn dins l’estat francés. La revision, presentada pel ministre de l’interior, l’ultradrechista Bruno Retailleau, a per mira de durcir las règlas de regularizacion dels sens-papièrs. Manuel Valls exprimiguèt son vòt que l’immigracion foguèsse “la mai pròcha de zèro”, en sostenent l'instauracion de quòtas, una reforma qu’implicariá pasmens un cambiament constitucional.

Manuel Valls, el meteis, nasquèt a Barcelona en 1962. Son paire, Miquel Valls, emigrèt a França pendent los ans 1940 e se maridèt amb Luisangela Galfetti, d’origina suïssa, maire de l’actual ministre d’otramar.

Son ultradrechizacion correspond d’a fons a l’evolucion del quite primièr ministre, lo bearnés François Bayrou, que dins una entrevista a l’endeman de la de son ministre Valls, se faguèt criticar quitament per la presidenta macronista de l’Assemblada Nacionala, Yaël Braun-Pivet, per aver parlat de “submersion migratòria” a prepaus de l’immigracion, coma o precisa lo quotidian francés Libération.