La region dicha Occitània e los ostals regionals de Nimes e Alès presentan del 10 al 23 de febrièr un programa plen d’activitats consagradas a la cultura occitana

Dins l’encastre de la Quinzena de las Lengas Regionalas (sic) en Occitània, los Ostals de “Ma Region” de Nimes e Alès vos convidan a descobrir e celebrar la lenga occitana per una molonada d’eveniments. Aquel programa met a l’onor la cultura occitana, amb d’activitats variadas, dobèrtas a totes.

A Nimes, l’eveniment comença lo 10 de febrièr amb un Cafè Occitan seguit d’un debat sus “Escriure, editar e difusar la lenga d’òc”, en preséncia d’autors e editors. Aquel ser, lo cantador Joanda ofrirà un concèrt acostic a 19h30, un moment per descobrir son album 1000ans. Lo 12 de febrièr, una vesita guidada del Jardin de la Font prepausarà de seguir las traças de la cultura occitana a Nimes.

A Alès, lo programa compren un concèrt de Joanda reservat als collegians lo 10 de febrièr a 15h 20, aital coma unà tièra d’obradors per mainatges, dont de faulas e cançons en occitan l’11 de febrièr. Lo 15 de febrièr, la vila aculhís un banh de lenga occitana a Sant Ipolit(Cevena Lengadociana), amb d’obradors lingüistics e culturals. Lo 21 de febrièr, una serada festiva a l’UrbanParc d’Alès claurà aquela quinzena amb de cançons e contes occitans.

En parallèl, d’exposicions sus las lenga e cultura occitanas seràn prepausadas a Nimes e Alès, e un escapegame permetrà d’iniciar a l’occitan d’una faiçon ludica los collegians e liceans.

Aquelas jornadas s’inscrivon dins lo quadre de l’accion lingüistica «Parlem una cultura viva», aprovada en 2022 per la region dicha Occitània, que desgatja 30 mesuras far amb la tòca d’acréisser la preséncia de las lengas occitana e catalana dins los espacis frequentats pel public e aumentar lo nombre de lors locutors. Demest aquelas mesuras i a la proclamacion d’un eveniment «regional de las lengas occitana e catalana qu’incita a la practica e a las iniciativas al benefici de las lengas sul territòri».

Podètz consultar lo programa sencer aicí.