La pollucion de l'aire, sustot l'exposicion a las particulas finas (PM2,5) e al dioxid d'azòt (NO2), es responsable de milièrs de novèls cases de malautiás cada annada dins l'estat francés, çò rapòrta Libération. Un estudi de Santat Publica França (SPF), publicat lo 29 de genièr. a permés de chifrar precisament las consequéncias sanitàrias d'aquela pollucion, qu'afècta a l'encòp la mortalitat e la morbiditat. «Lo grand public a pas encara consciéncia de sos impactes sus la santat e aqueles resultats son indispensables per los far venir concretament vesidors», çò expausèt Caroline Semaille, la directritz generala de SPF.

Segon un estudi ja publicat en 2021, los mainatges son particularament vulnerables, amb 40 000 novèls cases d'asma infantil cada annada, dont près del 20% son ligats a la pollucion de l'aire. Los adultes son tanben expausats, amb 8000 infarts del miocardi, 10 000 accidents vasculars cerebrals (AVC) e 4000 càncers del palmon atribuibles a l'exposicion a las particulas finas.

L'estudi publicat ara mòstra tanben que las populacions mai sensiblas a aquela pollucion comprenon las personas annadidas, los trabalhadors exteriors, las femnas emprenhadas e los fumaires. En mai d'aquò, l'impacte de la pollucion se limita pas a las vilas grandas: quitament dins las zònas ruralas, los nivèls de pollucion despassan sovent los lindals recomandats per l'Organizacion Mondiala de la Santat (OMS). «Cal pas pensar qu'es solament dins las zònas urbanas que i a de problematicas d'exposicion. Tota la populacion francesa dins totas las regions, quitament ruralas, es subrexpausada a de nivèls de particulas finas o de NO2 qu'engendran d'impactes sus la santat», çò detalhèt Sébastien Denys, director del servici Santat Environament Trabalh d'SPF.

Davant aquelas chifras alarmantas, los expèrts cridan a una reduccion significativa de la pollucion, en particular pel biais de politicas publicas refortidas. L'estudi indica que se França respectèsse las nòrmas de l'OMS, poiriá evitar la majoritat dels cases novèls de malautiás ligadas a la pollucion, redusent aital los impactes sanitaris e economics. Segon SPF, aquò permetriá d'estalviar fins a 12,9 miliards d'euros per an, principalament ligats als còstes dels suènhs de santat.