Lo divendres 13 de decembre, al rectorat de Tolosa, se faguèt lo segondConselh Academic de l’Ensenhament de l’Occitan (CAEÒC) de l’annada 2024. Apleguèt un quarantenat de personas fisicament o per vidèo. Malgrat los problèmas reals evocats pels sindicats, Òc-Bi, la region dicha Occitània, l’IEO e lo CRÈO, totes vegèron lo cambiament d’actitud del novèl IPR d’occitan, Tierrí Docina, qu’ensagèt de portar un aire fresc al rescontre. A respècte de l’ancian IPR, retirat ara, se vei una volontat d’un dialòg novèl combinat amb un vam vertadièr.

Ça que la, lo CRÈO Tolosa, per la votz del president E. Isopet, amb de chifras e exemples precises, mostrèt que la situacion de l’occitan dins l’acadèmia de Tolosa es pas bona. Per exemple, se diguèt que i a pas de doberturas de seccion bilingua francés-occitan dins las escòlas o encara s’evoquèt la non-aplicacion de la lei Molac e la crisi que la traversèt lo CAP’ÒC. Se parlèt tanben longament del problèma per recrutar de professors d’occitan.

Mas, fin finala, la carga del rector Moustapha Forar, en forma de conclusion agressiva contra lo president del CRÈO, mostrèt que l’Educacion Nacionala accèpta mal qu’òm relève sas mancanças.

Se pòt consultar lo compte rendut complet del CAEÒC de decembre passat en linha sul sit FÈLCO-CRÈO.