Dempuèi lo 5 de decembre, los trabalhadors de las bibliotècas municipalas de Tolosa se mobilizan contra las copaduras budgetàrias impausadas pel cònsol màger Jean-Luc Moudenc. La protèsta respond a la supression de contractes e a la reduccion radicala del budget de personal, e afècta lo foncionament de divèrsas bibliotècas de quartièr.

Amb d’assembladas generalas e divèrsas jornadas de cauma, los bibliotecaris an capitat a mobilizar fins a 150 trabalhadors en una sola jornada e lo sosten d’autres sectors en lucha. Reclaman la readmission dels contractats afectats, la fin de la politica d’austeritat e la defensa dels servicis publics, çò rapòrta Révolution Permanente.

Concretament, los caumaires exigisson lo renovelament dels contractes dels 16 trabalhadors en CDD non renovelats, aital coma lor titularizacion per garentir lor estabilitat. Reclaman tanben de revirar la reduccion del 75% dins lo budget d’embauchatge. S’opausan a las politicas d’austeritat impausadas per la comuna, ne demandan l’arrèst, mai que mai en cultura e educacion, e refusans la reforma dicha Proxima, qu’empejora las condicions de trabalh dins lo sector public. Defendon un servici bibliotecari de qualitat, amb totas las bibliotècas dobèrtas e sens limitacions per manca de personals.

Uèi, dimars 4 de febrièr, convòcan una mobilizacion davant lo sèti de Tolosa Metropòli, amb la tòca de refortir l’unitat sindicala e ciutadana contra las politicas d’austeritat.

 

 

 

 

 

View this post on Instagram

 

 

 

 

 

 

 

 

 

 

 

A post shared by @bibliotheque_en_lutte_toulouse