Aqueste dissabte 1r de febrièr, sus la pelena de l’estadi Brutus a Perpinhan, se rescontravan dins una partida amicala la formacion de Super League dels Dragons Catalans e los pensionaris del Championship del Tolosa Olimpic per una revista d’efectius abans las primièras partidas oficialas.

Los occitans marcavan dos ensages d’intrada, puèi la maquina catalana se metiá en marcha. A la pausa, los Sang e Aur menavan 26-10. Dins lo segond temps, los entraïnaires multipliquèron los cambiaments (per la partida, los locals utilizèron 24 jogaires e los vesitaires un vintenat) que permetèron als catalans de portar lor avantatge a 42-10.

Super-XIII: Avinhon resistís a Vilanòva

Dissabte, jos la pluèja, fàcia a Vilanòva d’Òlt, Avinhon marcava dos ensages dins lo primièr temps e se multiplicava puèi en defensa. L’ensag dels aquitans en tota fin de partida empachava pas los provençals de ganhar 12-6.

Los quarts de la Copa Lòrd Derby

Pel compte dels quarts de la Copa Lord-Derby, aqueste dissabte 8 de febrièr, Carcassona reçauprà los vesins limosencs. Aprèp Pià en ueiten, Vilanòva ensajarà d’eliminar una segonda formacion catalana: los Dragonets. Albi partirà grand favorit de la partida cò de Carpentràs (Elèit 2).

Dimenge 9, l’esquipa de Vilagalhenc-Argon RL (Elèit 2) espèra amb de legitimas pretencions la venguda de la formacion tolosana d’Elèit 1.

La partida de Cup dels Dragons retransmesa

Se poirà seguir la rintrada en competicion en Cup dels Dragons aqueste dissabte 8 de febrièr (una ora del vèspre, ora occitana) cò de las Pantèras d’Halifax sus la cadena YouTube The Sportsman. Lo mièg provençal Loís Joffret ven de despassar los 500 punts marcats jos las colors d’Halifax.

Rescontre presidencial?

De passatge en Aude, respondent a una question d’un cònsol màger tretzista, lo president de la federacion dels XV a declarat èsser dispausat a rescontrar lo president dels XIII. De seguir…

Provèrbi de Candelosa

Un provèrbi pels arrièrs un pauc malaisits (bravament… padenas!): «Per Candelosa, lo sòrt de la partida se jogarà sus una candela»; bona recepcion!