Cossí es preferible de consumar lo tè verd? Lo tè verd es uèi una de las bevendas mai consumadas al Mond après l’aiga. Es estat consumat en Asia pendent de sègles e en Occident es de mai en mai begut. Benlèu la causa ne son las siás proprietats. Pasmens, cossí se pòt melhor beure lo tè verd per qu’aquelas proprietats profièchen mai a la nòstra santat?

Lo tè verd es sinonim de regim e de bona santat. La majoritat de las siás proprietats venon del biais de produccion. Es fach de fuèlhas non oxidadas, non fermentadas e torradas de biais artesanal per preservar las siás qualitats. Conten fòrça antioxidants coma las catequinas, los polifenòls e las vitaminas B e C.

Aquò ajuda a luchar contra lo temps al nivèl cellular pr’amor de la siá vitamina C, redutz lo colesteròl e ajuda a prevenir cèrtas malautiás cardiovascularas e tanben contribuís fòrça a combatre cèrts càncers. Demesís la graissa corporala e tanben ajuda a luchar contra l’estransi e melhora las foncions cerebralas mercés a la teanina.

Divèrses biaisses de lo consumar

En Asia, foguèt creada la ceremònia del tè (en Japon) per lo poder plan consumar. Per o poder far, cal causir de fuèlhas de tè qualitosas: de matcha, de gyokuro, de gunpowder, de long jing, de ceylan o de darjeeling. Es preferible de consumar lo tè verd abans o après manjar e de lo consumir pas après 17h pr’amor de la siá teïna (cafeïna). E es necite de beure pas mai de 3 tassas jornadièras.

Tanben pòt èsser consumat de diferentas manièras. La version classica es l’infusion cauda. Cal aver 225 ml d’aiga e un culhieron de fuèlhas de tè. Quand l’aiga bolhís, i cal getar las fuèlhas e las daissar 3 minutas. Puèi cal filtrar la bevenda e la consumar amb de sucre o de mèl.

Amb lo tè verd de tipe matcha, las fuèlhas son una polvera que serà getada dins l’aiga cauda. Per far lo matcha usucha, cal un culhieron e mièg de polvera de tè de matcha (tè verd japonés) e una tassa de 60 ml d’aiga un pauc cauda. Puèi cal agitar lo tè, lo metre dins una autra tassa e lo beure lèu. (Legissètz la seguida).

Aqueste article es publicat dins Sapiéncia, la revista occitana de divulgacion scientifica, amb la quala Jornalet a un acòrdi de cooperacion. Podètz legir l'article entièr aicí.